Stambulda 60-njy Halkara IJS zergärçilik sergisi geçiriler
30-njy sentýabrdan 3-nji oktýabra çenli Stambulyň Sergiler merkezinde ýubileý 60-njy Halkara IJS Istanbul Jewelry Show zergärçilik sergisi geçiriler. Çäre dünýäniň öňdebaryjy brendlerini, öndürijilerini, dizaýnerlerini we gymmat bahaly şaý-sepleriň lomaý alyjylaryny bir ýere jemlär.
IJS sergisi 1986-njy ýyldan bäri geçirilip gelýär we dünýäniň iň iri bäş zergärçilik çäresiniň biri hasaplanýar. Ol GDA ýurtlary, Gündogar Ýewropa, Ýakyn Gündogar we Demirgazyk Afrika sebitleriniň hünärmenleri üçin esasy işewürlik meýdançasy bolup hyzmat edýär. Gatnaşyjylar altyn we kümüş şaý-sepleriň täze kolleksiýalary, gymmat bahaly daşlar, şeýle hem zergärçilik önümçiligi üçin döwrebap tehnologiýalar we enjamlar bilen tanyşyp bilerler.
Ýubileý sergisi Türkiýäniň zergärçilik pudagynyň önümçilik we sergi mümkinçiliklerini giňden görkezer. Telekeçiler we satyn alyjylar üçin bu öndürijiler bilen göni aragatnaşyk gurmaga, özara bähbitli şertnamalary baglaşmaga we pudagyň iň täze ugurlary bilen tanyşmaga ajaýyp mümkinçilik bolar.
Çäre barada has giňişleýin maglumat serginiň resmi web sahypasynda elýeterlidir www.istanbuljewelryshow.com.
ORIENT
