Türkmenistanda Adam hukuklary boýunça 2026–2030-njy ýyllar üçin Hereketleriň milli meýilnamasy taýýarlandy
25-nji iýulda Türkmenistanyň Daşary işler ministrliginde ýurtda adam hukuklary babatda halkara borçnamalarynyň we halkara ynsanperwer hukugynyň ýerine ýetirilmegini üpjün etmek boýunça pudagara toparyň nobatdaky mejlisi geçirildi. Mejlisiň dowamynda Pudagara toparyň 2026-njy ýylyň birinji ýarymynda alyp baran işleriniň netijeleri baradaky hasabat diňlenildi hem-de geljekki döwür üçin ileri tutulýan wezipeler ara alnyp maslahatlaşyldy.
Duşuşygyň esasy temasy Adam hukuklary boýunça 2026–2030-njy ýyllar üçin Hereketleriň milli meýilnamasynyň taslamasyny ara alyp maslahatlaşmak boldy. Bu resminama milli kanunçylygy öňdebaryjy halkara ülňülerine laýyk getirmek, şeýle hem raýatlar üçin durmuş-hukuk kepilliklerini berkitmek arkaly ýurtdaky adam hukuklaryny goramak ulgamyny täze derejä çykarmaga gönükdirilendir.
Mejlise satnaşyjylar 2024–2026-njy ýyllar üçin halkara ynsanperwer hukugyny ornaşdyrmak boýunça çäreleriň meýilnamasynyň ýerine ýetirilişiniň barşyna seredip, pudagara hyzmatdaşlygyny mundan beýläk-de kämilleşdirmegiň hem-de meýilnamada göz öňünde tutulan çäreleriň yzygiderli ýerine ýetirilmeginiň möhümdigini bellediler.
Türkmenistanyň Daşary işler ministri Raşid Meredow çykyşynda adam hukuklary babatda Türkmenistanyň alyp barýan syýasatynyň döwletiň ynsanperwer häsiýetini, halkara hyzmatdaşlygyny ösdürmäge hem-de öz üstüne alan halkara borçnamalaryny jogapkärçilikli ýerine ýetirmäge ygrarlydygyny aýdyň görkezýändigini belledi. BMG-niň edaralary we halkara bilermenler bilen yzygiderli alnyp barylýan dialogyň Türkmenistanyň dünýä bileleşiginiň açyk hem-de jogapkärli hyzmatdaşy hökmünde eýeleýän ornuny tassyklaýar.
