Saud Arabystany bilen ABŞ parahatçylykly atom energiýasy boýunça hyzmatdaşlyk hakynda ylalaşyga gol çekdiler
Iki strategik ýaran ýurduň energetika pudagyndaky hyzmatdaşlygy olaryň özara gatnaşyklarynda täze sahypany açýar. Ýadro tehnologiýalary barada gürrüň gidende, hyzmatdaşlyk diňe täjirçilik bähbitleri bilen çäklenmän, eýsem howpsuzlyk, ýadro ýaraglarynyň ýaýramazlygy we tehnologik garaşsyzlyk ýaly möhüm ugurlary hem öz içine alýar. Er-Riýad bilen Waşingtonyň arasynda gol çekilen bu ylalaşyk diňe bir diplomatik ädim bolman, eýsem Saud Arabystanynyň energetika çeşmelerini diwersifikasiýalaşdyrmak we onuň dünýä derejesindäki ornuny berkitmek ugrunda möhüm ädim hökmünde bahalandyrylýar.
Saud Arabystanynyň Energetika ministrligi penşenbe güni ABŞ bilen atom energiýasyny parahatçylykly maksatlar üçin peýdalanmak boýunça hyzmatdaşlyk barada ylalaşyga gol çekilendigini habar berdi. Resminama iki ýurduň köpýyllyk strategik hyzmatdaşlygyna esaslanýar we geçen ýylyň noýabr aýynda Saud Arabystanynyň mirasdüşer şazadasy hem-de Premýer-ministri Mohammed bin Salmanyň ABŞ-a amala aşyran sapary wagtynda taraplaryň bu ugur boýunça gepleşikleri tamamlandygy barada eden beýanatynyň logiki dowamydyr.
Ylalaşygyň maksady — parahatçylykly atom energetikasy ulgamynda hyzmatdaşlygy giňeltmek, tejribe, bilim we tehnologiýalar bilen alyşmak, şeýle hem ýadro howpsuzlygy, goragy we ýadro ýaraglarynyň ýaýramazlygy boýunça iň ýokary halkara standartlaryna laýyklykda bilelikde iş alyp barmakdan ybaratdyr. Resminama, şeýle hem, Saud Arabystanynyň energiýa çeşmelerini diwersifikasiýalaşdyrmak, öňdebaryjy tehnologiýalary ösdürmek we täze maýa goýum mümkinçiliklerini döretmek boýunça tagallalaryny goldaýar. Bu bolsa iki ýurduň hem özara bähbitlerine hyzmat edýär.
Saud Arabystany bilen ABŞ-nyň ýadro pudagyndaky hyzmatdaşlygynyň köpýyllyk taryhy bar. Şeýle-de bolsa, doly möçberli ylalaşyga gol çekilmegi atom elektrik stansiýalarynyň we ylmy-barlag merkezleriniň gurluşygy ýaly anyk taslamalaryň durmuşa geçirilmegine ýol açýar. Nebite garaşlylygyny azaltmagy maksat edinýän Saud Arabystany üçin bu ädim milli «Görüş 2030» strategiýasynyň möhüm bölegi hasaplanýar.
“CCTV+”-niň habar bermegine görä, bu ylalaşygyň diňe bir patyşalygyň energetika ulgamynyň özgertmegine däl, eýsem iki ýurduň arasynda tehnologik hyzmatdaşlygyň geljekki onlarça ýyllap pugtalandyrylmagyna hem ýardam etmegine garaşylýar.
