Türkmenistan saglygy goraýyş ulgamynda milli hasabatlylyk ulgamyny kämilleşdirýär
Aşgabatda Türkmenistanyň degişli ministrlikleriniň we pudaklaýyn edaralarynyň, şol sanda Maliýe we ykdysadyýet ministrliginiň, Saglygy goraýyş we derman senagaty ministrliginiň hem-de Statistika baradaky döwlet komitetiniň wekilleriniň Bütindünýä saglygy goraýyş guramasynyň, ÝUNİSEF-iň we BMG-niň agentlikleriniň tehniki bilermenleri bilen iş maslahaty geçirildi. Gepleşikleriň esasy temasy Durnukly ösüş maksatlaryny durmuşa geçirmegiň çäklerinde statistiki hasaba alyş usulyýetini ösdürmekden ybarat boldy.
BMG-niň Hemişelik utgaşdyryjysynyň edarasynyň goldaw bermeginde guralan bilelikdäki başlangyç Türkmenistanyň üçünji Meýletin milli synyny taýýarlamak boýunça çäreler toplumyna girýär.
Bilermenler maslahatlarynyň barşynda gatnaşyjylar Durnukly ösüş maksatlarynyň üçünji maksadynyň (DÖM 3) esasy görkezijilerini hasaba almagyň milli we halkara usulyýetlerini utgaşdyrmak meselelerine garadylar. Ilatyň ýokary hilli lukmançylyk-sanitar hyzmatlary bilen üpjün edilmeginiň depginini, eneligi we çagalygy goramak infrastrukturasynyň ösüşini, şeýle hem saglygy goraýyş ulgamynyň hünärmenler üpjünçiligini beýan edýän maglumatlaryň dolulygyna, deňeşdirilip bilinýändigine we ýokary takyklygyna aýratyn üns berildi.
Bitewi seljeriş standartlaryň döredilmegi hem-de sanly maglumatlaryň ulgamlaşdyrylmagy uzak möhletleýin meýilnamalaşdyrmagyň netijeliligini ýokarlandyrmaga we ýurdumyzyň halkara derejesindäki üstünliklerini obýektiw ýagdaýda beýan etmäge mümkinçilik berer.
Duşuşygyň netijeleri boýunça taraplar jemgyýetiň saglygynyň we abadançylygynyň bähbidine hyzmatdaşlygy pugtalandyrmaga ygrarlydyklaryny tassyklap, mundan beýläk-de tehniki özara gatnaşyklaryň ugurlaryny kesgitlediler.
