Türkmenistan bilen Türkiýe awiasiýa üçin hünärmenleri taýýarlamak boýunça hyzmatdaşlygy giňeldýärler
BILIM, 23-nji iýul | ORIENT. Aşgabatda Türkmenistanyň bilim ministri Jumamyrat Gurbangeldiýew bilen Türkiýäniň Awiasiýa Assosiasiýasynyň Uniwersitetiniň rektory, professor, doktor Rahmi Eriň arasynda gepleşikler geçirildi. Duşuşygyň esasy mowzugy raýat awiasiýasy we oňa ýakyn ýokary tehnologiýaly pudaklar üçin ýokary derejeli hünärmenleri taýýarlamak boldy.
Gepleşiklere iki ýurduň bilim we awiasiýa ulgamlarynyň wekilleri gatnaşdy. Bilim ministrliginiň habar bermegine görä, professor Rahmi Er türk uniwersitetiniň mümkinçiliklerini hem-de türkmen uçarmanlaryny taýýarlamak boýunça toplan tejribesini tanyşdyrdy. Şol bir wagtyň özünde gürrüň diňe bir uçarmanlary taýýarlamak bilen çäklenmedi.
Duşuşykda logistika ulgamyna öňdebaryjy çözgütleri ornaşdyrmak, uçuş howpsuzlygy, şeýle hem awiasiýa pudagynda emeli aňyň we kiberhowpsuzlygyň ulanylmagy ýaly meseleler ara alnyp maslahatlaşyldy.
Hyzmatdaşlyk talyplar we mugallymlar üçin göni akademiki alyş-çalyş maksatnamalarynyň ýola goýulmagyny, bilelikdäki okuw maksatnamalarynyň işlenip taýýarlanylmagyny hem-de Türkmenistanyň we Türkiýäniň ýokary okuw mekdepleriniň arasyndaky hyzmatdaşlygyň pugtalandyrylmagyny göz öňünde tutýar. Bu bolsa ulag-logistika pudagy üçin hünärmenleri taýýarlamakda täze tapgyry açýar.
