Narkolepsiýa garşy täze derman serişdesi ilkinji gezek Hytaýda tassyklanyldy
Innowasion derman serişdesi ilkinji gezek hut Hytaýda resmi taýdan tassyklananda, bu öňki adaty tertibi üýtgedýär. Ýakyn wagta çenli Hytaý diňe derman serişdeleri üçin uly bazar hasaplanylýardy, häzirki wagtda bolsa ol derman senagatynda täze ugurlary kesgitleýän ýurtlaryň birine öwrülýär. ABŞ-dan we Ýaponiýadan öňe geçen bu innowasion bejeriş usulynyň tassyklanmagy, hytaý kliniki ylmynyň dünýä derejesine çykandygyny görkezýär.
Narkolepsiýany bejermek üçin niýetlenen täze derman serişdesi ilkinji gezek Hytaýda satuwa rugsat aldy diýip, Hytaýyň Derman serişdelerine gözegçilik edýän milli müdirligi (NMPA) habar berdi. Bu derman serişdesi innowasion bejeriş usuly hökmünde ykrar edildi we çaltlaşdyrylan tassyklama tertibinden geçirildi. «Hytaý bu derman serişdesiniň satuwyny tassyklaýan ilkinji ýurt boldy. Bu taryhy öňegidişlikdir: biz ilkinji bolup ylmy-barlag netijelerini hödürledik we derman serişdesini bazara çykardyk» diýip, Hytaýyň Derman serişdelerine gözegçilik edýän milli müdirliginiň wekili Sýu Sýaosýan aýtdy.
Bilermenleriň bellemegine görä, Hytaýda, şol sanda seýrek duş gelýän keseller boýunça-da, derman serişdelerini işläp taýýarlamak üçin giň kliniki mümkinçilikler bar. «Dünýä Hytaýa diňe uly bazary sebäpli däl, eýsem kliniki barlaglar babatdaky artýan mümkinçilikleri we kämilleşdirilen kadalaşdyryş ulgamy sebäpli hem üns berýär» diýip, Pekin uniwersitetiniň wekili Han Fan aýtdy. Paýtagtyň lukmançylyk uniwersitetiniň wekili Çžan Şusin hem şeýle diýdi: «Hytaý indi diňe bir bazar bolman, eýsem innowasion derman serişdelerini işläp taýýarlamagyň we ornaşdyrmagyň esasy merkezleriniň birine öwrüldi».
Narkolepsiýa — adamyň duýdansyz uky tutmalary bilen häsiýetlenýän dowamly nerw ulgamynyň keselidir. Täze derman serişdesi dünýäniň dürli künjeklerindäki näsaglar üçin täze umyt döredýär. Bu üstünligi gazanmaga Hytaýda geçirilen özgertmeler hem-de hytaý kliniki merkezleriniň halkara ylmy-barlaglara işjeň gatnaşmagy ýardam etdi.
“CCTV+”-niň habar bermegine görä, bu waka Hytaýyň derman senagatynda dünýä derejesindäki standartlary döretmäge taýýardygyny görkezýär.
