Ýewropa Komissiýasy ÝB-niň senagaty üçin zyňyndy talaplaryny ýumşatmagy teklip etdi
Howa syýasaty bilen ykdysady bäsdeşlige ukyplylyk köplenç biri-birine garşy gelýär we Ýewropa Bileleşigi nobatdaky gezek şeýle saýlawyň öňünde dur. Bir tarapdan parnik gazlarynyň zyňyndylaryny azaltmak boýunça uly maksatlar bar, beýleki tarapdan bolsa berk talaplaryň senagat kärhanalarynyň Ýewropany terk etmegine getirip biljekdigi baradaky aladalar bar. Ýewropa Komissiýasynyň zyňyndy kwotalarynyň ýylsaýyn azaldylmagynyň depginini peseltmek we tölegsiz kwotalaryň ulanylýan möhletini uzaltmak baradaky teklibi howa meseleleriniň tarapdarlary bilen önüm öndürijileriň arasynda deňagramlylygy gazanmak synanyşygydyr.
Anna güni Ýewropa Komissiýasy Ýewropa Bileleşiginiň zyňyndy kwotalary bilen söwda ulgamyna täzeden garamagy teklip etdi. Munuň maksady ýewropaly kompaniýalar üçin zyňyndylary azaltmak boýunça talaplary ýumşatmakdan ybaratdyr. Hususan-da, 2031–2040-njy ýyllar aralygynda Ýewropa Bileleşigi boýunça uglerod zyňyndylary üçin umumy kwotalaryň ýyllyk azaldylyş depginini peseltmek hem-de Ýewropa Bileleşiginiň kompaniýalary üçin uglerod zyňyndy kwotalaryny tölegsiz ulanmagyň möhletini 2038-nji ýyla çenli uzaltmak teklip edilýär.
Mundan ozal Bolgariýa, Kipr, Çehiýa, Estoniýa, Gresiýa, Wengriýa, Italiýa, Polşa, Rumyniýa we Slowakiýa ýaly 10 ýurt bilelikdäki beýanata gol çekip, Ýewropa Bileleşigini daşky gurşawy goramak bilen senagatyň bäsdeşlige ukyplylygynyň arasynda deňagramlylygy üpjün etmäge çagyrdy. Bu ýurtlaryň pikiriçe, häzirki zyňyndylary azaltmak meýilnamalary senagat önümçiliginiň Ýewropadan başga sebitlere göçmegine sebäp bolup biler.
Ýewropa Komissiýasy zyňyndylary azaltmagyň depgininiň haýalladylýandygyna garamazdan, 2040-njy ýyla çenli parnik gazlarynyň arassa zyňyndylaryny 90 göterim azaltmak maksadynyň üýtgewsiz galýandygyny nygtady.
Zyňyndy kwotalary bilen söwda ulgamy Ýewropa Bileleşiginiň parnik gazlarynyň zyňyndylaryny azaltmak boýunça esasy gurallarynyň biridir. Bu ulgam «çäklendirme we söwda» ýörelgesi esasynda işleýär: kwotalaryň umumy möçberi her ýyl kemeldilýär we bu kompaniýalary has arassa tehnologiýalara geçmäge höweslendirýär. Şeýle-de bolsa, soňky ýyllarda uglerodyň bahasynyň ýokarlanmagy, aýratyn-da polat, himiýa we sement ýaly energiýa köp talap edýän pudaklarda işleýän ýewropaly öndürijileriň arasynda aladalaryň artmagyna sebäp boldy.
"CCTV+"-niň habar bermegine görä, Ýewropa Komissiýasynyň bu teklibiniň Ýewropa Parlamentinde hem-de agza döwletleriň arasynda gyzgalaňly jedelleri döretmegine garaşylýar. Sebäbi howa syýasaty boýunça garaýyşlar bu ýurtlaryň arasynda adatça biri-birinden tapawutlanýar.
