Türkmenistanyň ISESCO guramasynda synçy döwlet derejesindäki ilkinji ädimleri kesgitlenildi
AŞGABAT, 20-nji iýul | ORIENT. Türkmenistanyň Daşary işler ministrliginde ÝUNESKO-nyň işleri barada milli toparynyň mejlisi geçirildi. Onda 2026-njy ýylyň ilkinji ýarymynda ýerine ýetirilen işleriň netijeleri jemlenildi we ýakyn geljek üçin esasy wezipeler kesgitlenildi.
Türkmenistanyň DIM-niň habar bermegine görä, duşuşygyň dowamynda gatnaşyjylar şu ýylyň maý aýynda Türkmenistanyň eýe bolan Yslam dünýäsiniň Bilim, ylym we medeniýet boýunça guramasynda (ISESCO) synçy döwlet derejesiniň amaly taýdan durmuşa geçirilmegine aýratyn üns berdiler. Mejlisde bu halkara meýdançada özara gatnaşyklaryň anyk ugurlary we geljegi uly bilim taslamalary ara alnyp maslahatlaşyldy.
Toparyň agzalary ÝUNESKO bilen taryhy-medeni mirasy gorap saklamak, ylmy ösdürmek hem-de milli gymmatlyklarymyzy halkara giňişliginde giňden wagyz etmek boýunça alnyp barylýan bilelikdäki başlangyçlaryň ýagdaýyna baha berdiler.
