Azerbaýjanda tamdyrda çörek ýapmak däpleri ÝUNESKO-nyň sanawyna girizildi
Azerbaýjanda däp bolan palçyk peji — tamdyry ýasamak we onda çörek bişirmek sungaty ÝUNESKO-nyň Adamzadyň maddy däl medeni mirasynyň sanawyna resmi taýdan girizildi.
Degişli karar Paragwaýyň Asunsýon şäherinde geçirilen Hökümetara komitetiň 19-njy mejlisinde kabul edildi. Hasaba alnan nominasiýanyň resmi ady «Tandir craftsmanship and bread baking in Azerbaijan» diýlip atlandyrylýar. Şeýlelikde, ÝUNESKO tarapyndan ykrar edilen Azerbaýjanyň medeni mirasynyň elementleriniň sany 24-e ýetdi. Degişli edaranyň wekilleri muny ýurduň medeni mirasy üçin möhüm waka hökmünde häsiýetlendirdiler.
Bu täzelik Ykdysady Hyzmatdaşlyk Guramasyna (ECO) agza ýurtlar üçin hem aýratyn ähmiýete eýedir. Sebäbi tamdyr tutuş sebitiň umumy taryhy we durmuş-medeni mirasynyň aýrylmaz bölegi bolup durýar.
«Tamdyr nany», «tanur» ýaly meňzeş atlar bilen tanalýan köp asyrlyk tamdyrda çörek ýapmak däpleri Türkmenistanda, Gazagystanda, Gyrgyzystanda, Özbegistanda, Täjigistanda, Eýranda we Türkiýede hem giňden saklanyp galýar. Bu senetçiligiň halkara derejede ykrar edilmegi medeni diplomatiýanyň ösmegine itergi berýär hem-de senagat önümçiliginiň täsiri astynda ýitip gitmek howpy bilen ýüzbe-ýüz bolýan ýerli däpleri goramaga ýardam edýär.
ÝUNESKO-nyň bilermenleri diňe bir hünär ussatlygyny däl, eýsem bu däbiň çuňňur jemgyýetçilik ähmiýetini hem aýratyn nygtadylar. Tamdyrda çörek ýapmak maşgala agzalaryny we goňşulary birleşdirýän, jemgyýetçilik gatnaşyklaryny pugtalandyrýan däp bolup gelýär. Bu gymmatly medeni mirasy uzak möhletleýin goramak maksady bilen ussatlaryň ýörite birleşikleri döredilýär we ýaşlar üçin amaly okuw sapaklary geçirilýär.
ORIENT
