Ispaniýa – dünýä çempiony! Argentina goşmaça wagtda ýeňildi
Ispaniýa – dünýä çempiony! Argentina goşmaça wagtda ýeňildi. Futbol diňe bir oýun däl, eýsem bir pursaty baky ýatda galýan taryha öwürýän sungatdyr. Duşuşygyň ykbaly goşmaça wagtda çözülip, ätiýaçdan meýdança çykan oýunçy milli gahrymana öwrülende, beýikligiň diňe zehin bilen däl, eýsem erk, ynam we öz wagtyna garaşyp bilmek arkaly gazanylýandygyny görkezýär. Ispaniýa ilkinji dünýä çempionlygyndan 16 ýyl soň ýene-de dünýä futbolynyň iň belent sepgidine çykyp, hakyky çempionlaryň gaýdyp gelmegi başarýandygyny subut etdi.
Kesgitleýji pursat oýnuň 106-njy minutynda geldi. Ätiýaçdan meýdança çykan Ferran Torres çalt garşylykly hüjümi derwezäniň ýokarky burçuna güýçli urgusy bilen tamamlap, ýeňiş goluny geçirdi.
Bu ýeňiş Ispaniýany 2010-njy ýylda Günorta Afrikada gazanan ilkinji dünýä çempionlygyndan 16 ýyl soň ýene-de dünýä futbolynyň çür başyna çykardy.
Duşuşyk başlamazyndan öň Madridiň Kolon meýdanyna müňlerçe janköýer ýygnanyp, ony gyzyl we sary reňkleriň ummanyna öwürdiler. Ýurduň ähli künjeginde baýramçylyk ruhy, aýdym-saz, dürli gyzykly çäreler we dartgynly garaşyş höküm sürdi. Janköýerleriň ählisi milli ýygyndynyň ikinji ýyldyzyny gazanmagyna umyt baglaýardy. Ispaniýanyň milli ýygyndysynyň janköýeri Sofiýa Pullen şeýle diýdi: "Sebäbi Ispaniýa her gün dünýä çempionatynyň finalyna çykmaýar. Men ýürekden ýeňiş gazanmagymyzy isleýärin. Eger mamam meni telewizorda görse, örän bagtly bolar". Başga bir janköýer Huan Molina bolsa: "Men şu gün Ispaniýanyň ýeňjekdigine umyt edýärin. Bu örän agyr we çekeleşikli oýun bolar diýip pikir edýärin, ýöne şonda-da Ispaniýanyň üstün çykjakdygyna ynanýaryn" — diýdi. Duşuşyk tamamlanandan soň tutuş ýurt boýunça uly şatlykly dabaralar geçirildi. Ispaniýaly janköýer Karlos Montero öz duýgularyny şeýle beýan etdi: "Bu akyla sygmajak waka. Ähli döwürleriň iň beýik futbolçysy hasaplanýan garşydaşyňy ýeňmek her gün bolýan zat däl. Bu ýerdäki atmosfera täsin. Men hatda häzir nirede durandygymy hem duýamok. Her pursatdan lezzet aldym. Bu taryhy pursat we men muny ömrümde gaýtadan başdan geçirip bilmerin".
Soňky duşuşyk 2022-nji ýylyň dünýä çempiony Argentina bilen geçirildi. Bu final 2010-njy ýylyň finalyny ýatlatdy. Şol wagt hem Ispaniýa 1:0 hasabynda ýeňiş gazanypdy, ýöne garşydaşy Niderlandlar milli ýygyndysydy. Soňky ýyllarda düzümini dolulygyna diýen ýaly täzelän Ispaniýanyň milli ýygyndysy dünýä futbolynyň iň ýokary derejesinde bäsleşmäge ukyplydygyny ýene bir gezek subut etdi. "CCTV+"-iň habar bermegine görä, bu ýeňişden soň Ispaniýa 2030-njy ýylda Portugaliýa we Marokko bilen bilelikde geçirjek dünýä çempionatynda futbol köýnekjesinde ikinji çempionlyk ýyldyzyny buýsanç bilen göterer.
