Hindistan ilkinji hususy orbital raketasyny üstünlikli uçurdy
Hindistanyň Skyroot Aerospace startapy «Aagaman missiýasynyň» çäklerinde «Wikram-1» raketa göterijisini üstünlikli uçurdy. Bu taryhy waka Hindistany ABŞ-dan we Hytaýdan soň hususy kompaniýalar tarapyndan kosmos enjamlaryny orbita çykarmak tehnologiýasyny özleşdiren dünýäniň üçünji ýurduna öwürdi.
Dört basgançakly «Wikram-1» raketasy Şriharikotadaky Satiş Dhawan adyndaky Kosmos merkezinden uçuryldy we birnäçe synag hem-de demonstrasiýa emeli hemralaryny pes Ýer orbitasyna üstünlikli çykardy. Uçuş wagtynda uglerod kompozitinden taýýarlanan korpusyň hem-de 3D printerde öndürilen raketa hereketlendirijileriniň netijeliligi tassyklandy. Orbita çykarylan enjamlaryň arasynda geljekde kosmos galyndylaryny arassalamak üçin ulanyljak robotlaşdyrylan manipulýatorlary synagdan geçirmek üçin niýetlenen enjamlar hem bar.
Ortaça ýaşy bary-ýogy 28 bolan ýaş inženerler toparyny bu üstünlik bilen Hindistanyň Premýer-ministri Narendra Modi hut özi gutlady. Raketanyň peýdaly ýüki doly Hindistanda öndürilen böleklerden ybarat boldy. Şeýle hem onuň düzümine kosmonawtlaryň açyk hatlary, hindi ylmynyň öňdebaryjylarynyň kiçi heýkeljikleri we 18 karat altyndan ýasalan kiçi raketa ýaly aýratyn ähmiýetli zatlar girizildi.
Hindistanyň Kosmos barlaglary guramasynyň (ISRO) ýolbaşçysy W. Naraýanan bu üstünligi döwlet tarapyndan geçirilen özgertmeleriň netijesi diýip atlandyrdy. Onuň sözlerine görä, bu özgertmeler hususy kompaniýalar üçin kosmos pudagyny açdy. Skyroot Aerospace kompaniýasynyň gazanan üstünligi Hindistana kiçi hemralary täjirçilik esasynda orbita çykarmak boýunça dünýä bazaryndaky ornuny has-da pugtalandyrmaga mümkinçilik berer.
ORIENT
