Emeli aň rak keselini anyklamagy we bejermegi özgertýär — hytaýly bilermen
Onkologiýa köp ýyllaryň dowamynda lukmançylygyň öňünde duran iň çylşyrymly meseleleriň biri bolup geldi. Aşgazanasty mäziň we peşew haltasynyň rak keselleri özleriniň howplulygy bilen tanalýar we köplenç hassalyk giç döwürde anyklanýardy. Häzirki wagtda emeli aň täze eýýamyň gapysyny açýar: ol adamyň gözüniň saýgaryp bilmeýän alamatlaryny ýüze çykarmaga, mutasiýalary piksel derejesinde seljermäge hem-de ölüm howply hasaplanýan keseli dolandyrylyp bolýan dowamly kesele öwürmäge mümkinçilik berýär.
Anna güni Şanhaýda geçirilen WAIC 2026 bütindünýä emeli aň maslahatynda Ženszi hassahanasynyň professory Lýu Inbin peşew haltasynyň we aşgazanasty mäziň rak keselleriniň irki alamatlarynyň örän duýdansyz we gizlin geçýändigini, emeli aňyň bolsa irki barlaglaryň netijeliligini ep-esli ýokarlandyryp biljekdigini aýtdy. «Aşgazanasty mäziň rak keselini irki tapgyrda anyklamak örän kyn.
Her on hassanyň dokuzysy bäş ýyldan köp ýaşap bilmeýär. Bu bolsa keseli mümkin boldugyça ir ýüze çykarmagyň örän möhümdigini görkezýär» diýip, Lýu aýtdy. «Emeli aň anyklaýyş ulgamyny düýpgöter üýtgetdi. Ýüzlerçe gen mutasiýasyny hasaplap we seljerip, emeli aň rak keselini onuň irki tapgyrlarynda ýüze çykarmaga ýardam berýär» diýip, ol sözüniň üstüni ýetirdi.
Lukman Sýa Ýuhan öt haltasynyň rak keselini anyklamak üçin döredilen emeli aň modelini tanyşdyrdy. «Lukman kompýuter tomografiýasynyň (KT) şekillerine seredende diňe umumy görnüşi görýär. Emeli aň bolsa şekilleri piksel derejesinde seljerýär we has takyk netijeleri üpjün edýär» diýip, ol düşündirdi. Professor Lýu Inbin geljege uly umyt bilen garaýandygyny aýdyp: «Elli ýyl ozal rak keseli bejerip bolmaýan kesel hasaplanýardy. Häzirki wagtda bolsa ol dowamly hroniki kesel hökmünde klassifikasiýa edilýär» diýdi.
WAIC 2026 sergisine 1100-den gowrak kompaniýa we 300 sany täze önüm gatnaşdy. Lukmançylyga bagyşlanan tematiki forum saglygy goraýyş ulgamynda emeli aňyň ulanylyşyny ara alyp maslahatlaşmak üçin esasy meýdançalardan birine öwrüldi.
“CCTV+”-iň habar bermegine görä, hytaýly hünärmenleriň işläp taýýarlan täze çözgütleri emeli aňyň eýýäm kliniki tejribä täsir edip başlandygyny görkezýär. Bu tehnologiýalar onkologiýa kesellerini bejermekde lukmançylygy has şahsylaşdyrylan we ýokary takyklykly çemeleşmä ýakynlaşdyrýar.
