Raşid Meredow ABŞ-nyň ilçisi Elizabet Rud bilen onuň Aşgabatdaky diplomatik işiniň jemleri barada pikir alyşdy
Türkmenistanyň Daşary işler ministrliginde 18-nji iýulda daşary syýasat edarasynyň ýolbaşçysy Raşid Meredow bilen Amerikanyň Birleşen Ştatlarynyň Türkmenistandaky Adatdan daşary we Doly ygtyýarly Ilçisi Elizabet Rudyň arasynda duşuşyk geçirildi. Ilçi ýurtdaky diplomatik missiýasyny tamamlaýar.
Duşuşygyň dowamynda taraplar bilelikdäki işleriň jemlerini jemlediler hem-de türkmen-amerikan dialogynyň durnukly oňyn depginde ösýändigini bellediler. Şeýle hem soňky ýyllarda ikitaraplaýyn gatnaşyklaryň pugtalandyrylmagynda ýokary we iň ýokary derejedäki özara saparlaryň hem-de gatnaşyklaryň işjeňleşdirilmeginiň möhüm orun eýeländigi nygtaldy.
Diplomatlar döwletara hyzmatdaşlygyň häzirki ýagdaýyny giňişleýin ara alyp maslahatlaşyp, uzak möhletleýin ileri tutulýan ugurlara aýratyn üns berdiler. Syýasy-diplomatik ugurda taraplar ministrlikleriň we degişli edaralaryň arasynda yzygiderli geňeşmeleri dowam etdirmäge ygrarlydyklaryny tassykladylar. Söwda-ykdysady ulgamda bolsa tehnologiýa alyş-çalşy, ulag, energetika we ekologiýa pudaklaryndaky taslamalar geljegi uly hyzmatdaşlyk ugurlary hökmünde görkezildi. Şeýle hem bilim, medeniýet we ynsanperwer hyzmatdaşlyk maksatnamalaryny giňeltmek meselelerine aýratyn üns berildi.
Duşuşygyň ahyrynda Raşid Meredow Elizabet Ruda Aşgabat bilen Waşingtonyň arasyndaky köpugurly hyzmatdaşlygyň ösdürilmegine goşan şahsy goşandy üçin hoşallyk bildirip, oňa geljekki hünär ýolunda üstünlik arzuw etdi. Öz gezeginde ABŞ-nyň diplomatik wekilhanasynyň ýolbaşçysy Türkmenistanyň ýolbaşçylaryna diplomatik gullugy döwründe beren hemmetaraplaýyn goldawy, konstruktiw hyzmatdaşlygy we işlemek üçin döredilen amatly şertler üçin tüýs ýürekden hoşallyk bildirdi.
