Russiýa WAICO-nyň esaslandyryjylaryna goşuldy, Hytaý Global Günorta emeli aň ulgamynda hyzmatdaşlygy teklip etdi
Ýewraziýanyň iň iri iki döwleti emeli aň ulgamynda tagallalaryny birleşdirende, bu diňe ikitaraplaýyn hyzmatdaşlygyň çäginden çykýar. Bu ösüş, ösüp barýan ýurtlaryň ünsden düşürilmejek täze tehnologik binýadynyň kemala gelýändiginiň alamaty hökmünde görülýär. Hytaý bilen Russiýa Emeli aň boýunça bütindünýä hyzmatdaşlyk guramasynyň (WAICO) esaslandyryjylary hökmünde monopoliýa däl-de, bilelikdäki ösüşe esaslanýan hyzmatdaşlyk nusgasyny hödürleýärler. Şeýle çemeleşmede bilim we tehnologiýalar dünýä derejesindäki deňsizlikleri azaltmagyň möhüm gurallaryna öwrülýär.
Anna güni Hytaýyň daşary işler ministri, Hytaýyň Kommunistik partiýasynyň Merkezi komitetiniň Syýasy býurosynyň agzasy Wan I Şanhaý şäherinde geçirilen 2026-njy ýylyň Bütindünýä emeli aň maslahatynyň (WAIC) çäklerinde Russiýanyň Prezidentiniň Diwanynyň ýolbaşçysynyň orunbasary Maksim Oreşkin bilen duşuşdy.
Wan I Hytaýyň Global Günorta ýurtlarynyň emeli aň ulgamyndaky mümkinçiliklerini artdyrmak maksady bilen Russiýa bilen hyzmatdaşlyga taýýardygyny aýtdy. Ol iki tarapy giňişleýin geňeşmeler, bilelikdäki goşant we özara bähbit ýörelgelerine esaslanyp, emeli aňyň sagdyn, howpsuz we tertipli ösüşine ýardam bermäge çagyrdy.
Öz gezeginde Maksim Oreşkin Russiýanyň Emeli aň boýunça bütindünýä hyzmatdaşlyk guramasynyň (WAICO) esaslandyryjylarynyň biri bolmagyna şatdygyny aýtdy. Şeýle hem ol guramanyň ösüşini goldamak we emeli aň ulgamynda ikitaraplaýyn hyzmatdaşlygy has-da çuňlaşdyrmak üçin Hytaý bilen ýakyndan hyzmatdaşlyk etmäge taýýardygyny belledi.
Bir gün öň Şanhaýda 29 döwlet WAICO guramasyny döretmek baradaky ylalaşyga gol çekdi. Bu gurama emeli aň ulgamynda halkara hyzmatdaşlygyny we ählumumy dolandyryşy ösdürmegi maksat edinýär.
Russiýa bilen Hytaý, BMG-niň Howpsuzlyk Geňeşiniň hemişelik agzalary hem-de tehnologiýa pudagynyň esasy gatnaşyjylary hökmünde, bu guramany emeli aň tehnologiýalarynyň ösüş ýaryşyndan köplenç çetde galýan ösüp barýan ýurtlaryň bähbitlerini ilerletmäge hyzmat etjek halkara meýdança hökmünde görýärler.
CCTV+ agentliginiň habar bermegine görä, WAICO-nyň çäklerinde Hytaý bilen Russiýanyň hyzmatdaşlygynyň Afrika, Aziýa we Latyn Amerikasy ýurtlary üçin açyk bilim maksatnamalarynyň, bilelikdäki ylmy-barlag taslamalarynyň hem-de tehnologiýalary geçirmek mehanizmleriniň döredilmegine ýardam etmegine garaşylýar.
