Brýusselde “Ýewropa Bileleşigi – Merkezi Aziýa” ýokary derejeli syýasy dialogy geçirildi
Türkmenistanyň Daşary işler ministriniň orunbasary Ahmet Gurbanow 16-njy iýulda Brýusselde geçirilen “Ýewropa Bileleşigi – Merkezi Aziýa” syýasat we howpsuzlyk meseleleri boýunça Ýokary derejeli dialogyň 13-nji mejlisine gatnaşdy. Türkmenistanyň wekiliýetiniň ýolbaşçysy çykyşynda Aşgabatyň bu formaty Merkezi Aziýa bilen Ýewropanyň mümkinçiliklerini birleşdirmek üçin netijeli meýdança hökmünde görýändigini belledi. Çykyşda uzak möhletleýin parahatçylygyň berk binýadynyň syýasy-diplomatik usullara, döwletleriň arasyndaky ynama, durnukly ösüşe hem-de BMG-niň utgaşdyryjy esasy ornuna daýanmalydygy aýratyn nygtaldy.
Şol gün Brýusselde geçirilen forumyň çäklerinde türkmen wekiliýeti Ýewropanyň ýokary derejeli diplomatlary bilen birnäçe möhüm ikitaraplaýyn duşuşyk geçirdi. Türkmenistanyň daşary işler ministriniň orunbasary Ahmet Gurbanow Ýewropa Bileleşiginiň Owganystan boýunça ýörite wekili Žil Bertran bilen sebitdäki durnuklylyk we owgan ugry boýunça hyzmatdaşlyk meselelerini ara alyp maslahatlaşdy. Taraplar BMG-niň Doha prosesiniň çäklerinde tagallalary utgaşdyrmaga, şeýle hem Owganystanyň gatnaşmagynda iri ulag we energetika taslamalaryny mundan beýläk-de durmuşa geçirmäge aýratyn üns berdiler. Mundan başga-da, serhet howpsuzlygy boýunça BOMCA maksatnamasynyň hem-de neşe serişdelerine garşy göreş boýunça CADAP sebit maksatnamasynyň çäklerinde bilelikdäki işleriň dowam etdirilmegi ara alnyp maslahatlaşyldy.
Türkmen diplomatyň Ýewropa Daşary gatnaşyklar gullugynyň Baş sekretarynyň orunbasary Olof Skug bilen geçiren duşuşygy hem aýratyn ähmiýete eýe boldy. Duşuşygyň esasy mowzuklary ulag ulgamlaryny özara utgaşdyrmak boýunça amaly ädimler we Ýewropa Bileleşiginiň “Global Gateway” başlangyjynyň çäklerinde Hazarüsti ulag geçelgesiniň ägirt uly mümkinçiliklerini açyp görkezmek boldy. Mundan başga-da, diplomatlar energetika pudagynda hyzmatdaşlygy giňeltmäge özara gyzyklanmalaryny tassykladylar. Hususan-da, gaýtadan dikeldilýän energiýa çeşmelerini ornaşdyrmak, energiýa netijeliligini ýokarlandyrmak we atmosfera metan zyňyndylaryny azaltmaga gönükdirilen tehnologiýalary goşmak bilen, ekologiýa başlangyçlaryny ilerletmek meselelerine aýratyn üns berildi.
