Si Szinpin emeli aňyň hemişe adamyň gözegçiliginde bolmagyna çagyrdy
Hytaý Halk Respublikasynyň Başlygy Si Szinpin 17-nji iýulda, Şanhaý şäherinde geçirilen Emeli aň boýunça 2026-njy ýylyň Bütindünýä maslahatynyň we Emeli aňyň ählumumy dolandyrylyşy boýunça ýokary derejeli maslahatyň açylyş dabarasynda maksatnamalaýyn çykyş etdi. Başlyk Si Szinpin çykyşynda emeli aň bilen baglanyşykly töwekgelçiliklere düşünmegiň möhümdigini nygtap, bu tehnologiýanyň howpsuzlygyny, ygtybarly dolandyrylyşyny we hemişe adamyň gözegçiliginde saklanmagyny üpjün etmäge çagyrdy.
«Emeli aň adamzat üçin ygtybarly gural bolmalydyr. Biz emeli aňyň döredip biljek içerki we ikinji derejeli töwekgelçilikleriniň dürli görnüşlerine örän jogapkärçilikli çemeleşmelidiris. Howpsuzlyk ulgamyny pugtalandyrmak, nädogry we zyýanly ulanylyşyň öňüni almak, şeýle hem emeli aňyň hemişe adamyň gözegçiliginde bolmagyny üpjün etmek üçin kanunlary we kadalaşdyryjy namalary, tehnologik gözegçilik, irki duýduryş we adatdan daşary ýagdaýlara garşy hereket etmek ulgamlaryny döretmelidiris» diýip, Si Szinpin aýtdy.
Hytaýyň Başlygy şeýle hem ähli taraplary emeli aň ulgamynda milli howpsuzlyk düşünjesiniň aşa giňeldilmegine hem-de bir ýurduň howpsuzlygynyň beýleki ýurtlaryň howpsuzlygyndan ileri tutulmagyna garşy bilelikde çykyş etmäge çagyrdy.
