Malaýziýa Türkmenistan üçin täze syýahatçylyk mümkinçiliklerini açýar
Malaýziýa syýahatçylyk pudagynda Türkmenistan bilen hyzmatdaşlygy işjeň ösdürýär. Aşgabatda iki ýurduň syýahatçylyk pudagynyň wekilleriniň gatnaşmagynda «Visit Malaysia 2026» dünýä möçberli syýahatçylyk maksatnamasyny ilerletmäge bagyşlanan ilkinji ýöriteleşdirilen duşuşyk geçirildi.
Bu ugurdaky hyzmatdaşlygyň ösdürilmegine Aşgabat bilen Kuala-Lumpuryň arasynda yzygiderli amala aşyrylýan göni howa gatnawlary ýardam berýär. Göni gatnawlar deňiz kenarynda dynç almak, iş saparlary ýa-da okuw maksatly syýahatlar üçin amatly we çalt mümkinçilik döredýär.
Türkmenistanyň raýatlarynyň Malaýziýa syýahat etmäge bolan gyzyklanmasy yzygiderli artýar. Geçen ýyl bu ýurda syýahat edenleriň sany 42 göterimden hem köp artyp, 10 müň adamdan geçdi. Bu oňyn ösüş şu ýylda hem dowam edýär.
Malaýziýa özboluşly tebigaty, baý medeni mirasy we ýokary howpsuzlyk derejesi bilen syýahatçylary özüne çekýär. Mundan başga-da, ýurt halal infrastrukturasynyň ösmegi we myhmansöýerligi sebäpli musulman syýahatçylary üçin dünýäniň iň amatly ugurlarynyň biri hökmünde ykrar edilýär.
Aşgabatda geçirilen duşuşyk türkmen syýahatçylyk agentliklerine malaýziýaly hyzmatdaşlar bilen göni gatnaşyklary ýola goýmaga mümkinçilik berdi. Bu bolsa ýakyn wagtda syýahatçylar üçin has amatly syýahat bukjalarynyň, täze teklipleriň we gyzykly gezelenç ugurlarynyň peýda bolmagyna ýardam eder.
ORIENT
