Şweýsariýanyň ilçihanasynyň wekiliýeti Türkmenistanyň Döwlet energetika institutyna baryp gördi
10-njy iýulda Türkmenistanyň Döwlet energetika institutynda Şweýsariýa Konfederasiýasynyň ilçihanasynyň wekilleri bilen duşuşyk geçirildi. Daşary ýurt wekiliýetiniň düzümine ilçihananyň sebit hyzmatdaşlygy boýunça wekiliýet başlygynyň orunbasary hem-de syýasy geňeşçisi girdi.
Sapar institutyň täze goşmaça okuw binasynyň eýwanynda guralan ylmy we taslama işleriniň sergisi bilen tanyşlykdan başlandy. Institutyň talyplary we mugallymlary diplomatlara energetika pudagyndaky öňdebaryjy işläp taýýarlamalaryny görkezdiler.
Duşugyň esasy bölegi maslahatlar zalynda ikitaraplaýyn gepleşikler görnüşinde geçirildi. Gatnaşyjylar Türkmenistanyň Döwlet energetika institutynyň köp ýyllaryň dowamynda Ýewropa Bileleşigi, şol sanda Ýewropada Howpsuzlyk we Hyzmatdaşlyk Guramasy (ÝHHG) bilen iri halkara maksatnamalarynyň çäklerinde üstünlikli hyzmatdaşlyk edip gelýändigini bellediler.
Duşuşygyň esasy mowzugy innowasion ylym-bilim taslamalaryny mundan beýläk bilelikde durmuşa geçirmek boýunça anyk ädimleri ara alyp maslahatlaşmak boldy. Taraplar tejribe alyşmagy işjeňleşdirmäge hem-de häzirki zaman tehnologik çözgütlerini okuw işine ornaşdyrmaga özara gyzyklanma bildirýändiklerini tassykladylar.
ORIENT
