HNweGU-nyň talyplary BAE-niň Halifa uniwersitetinde okuw-önümçilik tejribeligini tamamladylar
1–10-njy iýul aralygynda Yagşygeldi Kakaýew adyndaky Halkara nebit we gaz uniwersitetiniň (HNweGU) talyplary Birleşen Arap Emirliklerinde okuw-önümçilik tejribeligini geçdiler. Okuw Abu-Dabi şäherindäki abraýly Halifa uniwersitetinde daşary ýurtly talyplar üçin guralýan «Tomusky energetika lageri» halkara maksatnamasynyň çäklerinde geçirildi.
Bu tejribeligiň esasy maksady ADNOC nebit kompaniýasynyň önümçilik işi bilen tanyşmak, şeýle hem Halifa uniwersitetiniň bilim we ylmy-barlag ugurlarynda toplan öňdebaryjy tejribesini öwrenmekden ybarat boldy. Şeýle halkara alyş-çalyşy geljekki türkmen hünärmenlerine nazary bilimlerini gymmatly amaly tejribe bilen baýlaşdyrmaga mümkinçilik berdi.
Okuwyň dowamynda talyplar häzirki zaman nebitgaz tehnologiýalaryny hem-de energetika pudagynda emeli aňyň ulanylyşyny öwrendiler. Şeýle-de olar uniwersitetiň barlaghanalarynda öňdebaryjy önümçilik usullary bilen tanyşdylar, ýöriteleşdirilen okuw merkezlerine we muzeýlere baryp gördüler.
Maksatnama ADNOC kompaniýasynyň önümçilik desgalaryna, aerokosmos barlaghanasyna, tehniki hyzmat barlaghanasyna we 3D çap merkezine saparlary hem öz içine aldy. Mundan başga-da, ýaş hünärmenler üçin gaýtadan dikeldilýän energiýa çeşmeleri, guýulary burawlamak, nebitgaz inženerligi hem-de gatlak suwuklyklarynyň häsiýetleri boýunça gysga möhletli okuwlar guraldy.
Bu sapar ýokary okuw mekdepleriniň arasyndaky hyzmatdaşlygy ösdürmäge hem-de ýokary hünärli işgärleri taýýarlamaga möhüm goşant goşdy.
ORIENT
