Halkara ynsanperwer ylymlary we ösüş uniwersitetiniň talyplary Florensiýada tomusky tejribeligini geçýärler
Halkara ynsanperwer ylymlary we ösüş uniwersitetiniň (HYYweÖU) talyplary Italiýa sapar bilen bardylar. Tomusky okuw-tejribe sapaklary dünýäniň öňdebaryjy bilim merkezleriniň biri bolan Kent döwlet uniwersitetiniň (ABŞ) Florensiýadaky şahamçasynda geçirilýär.
Tejribeligiň maksatnamasy geljekki sosiologlar, žurnalistler, diplomatlar we ykdysatçylar üçin gönükdirilendir. Okuwlaryň çäginde türkmenistanly talyplar dünýä derejeli professorlaryň derslerine gatnaşýarlar; dürli ýurtlardan gelen deň-duşlary bilen bilelikdäki ylmy-barlag taslamalarynyň üstünde işleýärler; häzirki zaman halkara usulyýetlerini we ynsanperwer ugurlary öwrenýärler.
Ýokary akademiki işjeňliginden başga-da, Ýewropanyň Galkynyş eýýamynyň ojagy bolan Florensiýa ýaş hünärmenler üçin medeni alyş-çalyş babatda uly mümkinçilikleri açýar. Okuw sagatlaryndan daşary guralýan gezelençler we dünýä sungatynyň ajaýyp eserleri bilen tanyşmak, geljekki ynsanperwer ugrunyň hünärmenlerine dünýägaraýşyny giňeltmäge we döredijilik kuwwatyny artdyrmaga kömek edýär.
Munuň ýaly okuw tejribeliginiň guralmagy HYYweÖU-niň halkara bilim giňişligine goşulyşmak strategiýasynyň bir bölegidir. Ýewropanyň esasy medeni merkezleriniň birinde talyplaryň alan tejribesi, olaryň geljekki hünär ýoly üçin berk binýat bolar.
