Yssyny ýeňip geçmegiň ýoly: Türkiýe tomusky dynç alyş üçin serginlediji täze mümkinçilikleri hödürleýär
Dünýäni yssy howanyň gurşap alan döwründe Türkiýäniň deňiz kenarlary syýahatçylara adaty kenar dynç alyşyndan has giň mümkinçilikleri hödürleýär. Özboluşly mikroklimaty, deňiz şemallary we dag goraghanalarynyň köplügi netijesinde bu ýerde deňiz kenaryndaky dynç alyşy salkyn gezelençler bilen utgaşdyrmak mümkin.
Egeý deňziniň serginlediji şemaly
Egeý deňziniň kenarynda ajaýyp we salkyn dynç alyş üçin esasy ugur Bodrum bolup durýar. Ýarymadada ýerleşýän bu şypahana hemişe deňiz şemallary bilen serginledilýär, MICHELIN gollanmasyna girizilen restoranlarynda bolsa möwsümleýin ýeňil tagamlar hödürlenýär.
Izmirde Foça we Çeşme şypahanalary (Altynkum we Kojakary kenarlary) salkyn suwlary bilen meşhurdyr. Alaçatydaky hemişelik şemallar bolsa windserfing üçin amatly şertleri döredýär. Mundan başga-da, golaýdaky gadymy Efes şäherine indi agşam sagatlarynda baryp görmek mümkin bolup, bu syýahatçylara agşamky salkynlykda taryhy ýadygärliklerden lezzet almaga mümkinçilik berýär.
Demirgazygyň salkynlygy we buz ýaly şaglawuklar
Has salkyn howany halaýanlar Egeý deňziniň demirgazygyndaky Çanakkale welaýatyna baryp bilerler. Assos şäherinde demirgazyk şemallary tomusky yssyny ep-esli ýeňilleşdirýär. Golaýdaky Ida dagy dünýäde kisloroda iň baý tebigy goraghanalaryň biri bolup, sosna tokaýlary we buz ýaly sowuk şaglawuklary bilen tanalýar. Şeýle hem Bozjaada we Gökçeada adalary asuda aýlaglary hem-de tämiz tebigaty bilen syýahatçylary özüne çekýär.
Türk Riwýerasy: gowaklar we gijeki muzeýler
Antalýadaky Türk Riwýerasynda yssy günlerde tebigy «kondisioner» hasaplanýan Karain we Damlataş gowaklary dynç almak üçin ajaýyp ýerlerdir. Bu gowaklarda ýylyň dowamynda howanyň temperaturasy 18–22°C derejesinde saklanýar. Şeýle hem Köprülü kanýonynyň buz ýaly sowuk suwlarynda ýa-da Kaş sebitindäki daýwing wagtynda serginlemek bolýar.
Agşam düşenden soň «Gijeki muzeýler» taslamasy syýahatçylara Patara we Aspendos gadymy şäherlerini ýyldyzly asmanyň astynda rahat ýagdaýda synlamaga mümkinçilik berýär.
Başga bir mümkinçilik: Gara deňiz kenary
Iň salkyn howany we tebigy gözelligi gözleýänler üçin Türkiýäniň Gara deňiz kenary ajaýyp saýlawdyr. Dag howasy we ýaşyl tebigaty bilen tapawutlanýan bu sebit National Geographic žurnalynyň «2026-njy ýylyň dünýäniň iň gowy syýahat ugurlary» sanawyna girizildi.
ORIENT
