IBIA EXPO 2026: Stambulda düşek öndürmek üçin öňdebaryjy tehnologiýalar we toplum bölekleri görkeziler
2026-njy ýylyň 16–19-njy sentýabry aralygynda Istanbul Expo Center sergi merkezinde düşek öndürmek üçin tehnologiýalara we toplum böleklerine bagyşlanan 5-nji halkara IBIA EXPO 2026 sergisi geçiriler. Bu çäre Türkiýedäki şu ugur boýunça ýeke-täk ýöriteleşdirilen halkara sergi bolup, dünýäniň dürli ýurtlaryndan esasy öndürijileri, üpjün edijileri we satyn alyjylary bir ýere jemlär. Serginiň guramaçysy BİFAŞ kompaniýasydyr.
Sergide 300-den gowrak öňdebaryjy kompaniýa öz önümlerini, çig mallaryny, enjamlaryny hem-de innowasion tehniki çözgütlerini tanyşdyrar. Guramaçylaryň çaklamagyna görä, sergä 90 ýurtdan 23 müň töweregi pudak hünärmeni we satyn alyjy gatnaşar. Çäräniň esasy maksady eksport mümkinçiliklerini giňeltmek we täze işewür hyzmatdaşlyklary döretmekden ybaratdyr. Şunuň bilen baglylykda, serginiň çäklerinde gatnaşyjylar bilen daşary ýurtly satyn alyjylaryň arasynda ýörite B2B duşuşyklary guralar.
Bu serginiň işewürlik üçin ähmiýeti
Sergi pudagyň wekilleri üçin ygtybarly üpjün edijileri tapmaga, iň täze ugurlar bilen tanyşmaga hem-de önümçilige awtomatlaşdyryş çözgütlerini ornaşdyrmaga giň mümkinçilik döreder. Halkara hyzmatdaşlygyny ýeňilleşdirmek maksady bilen, guramaçylar daşary ýurtly satyn alyjylar toparlarynyň agzalary üçin myhmanhanada mugt ýerleşdirilmegi we transfer hyzmatyny hödürleýärler.
Bu maksatnama arkaly daşary ýurtly hyzmatdaşlaryny getirmek isleýän kompaniýalar jikme-jik maglumat almak üçin öňünden BİFAŞ kompaniýasy bilen habarlaşmalydyr.
Giňişleýin maglumat almak we hasaba durmak üçin çäräniň resmi web sahypasyna ýüz tutup bilersiňiz: https://ibiaexpo.com.
ORIENT
