Türkmenistanda howanyň üýtgemegi boýunça ÝUNISEF-iň ikinji Tomusky mekdebi açyldy
ÝUNISEF Türkmenistanyň Bilim ministrligi we Daşky gurşawy goramak ministrligi bilen bilelikde ýaşlar üçin howanyň üýtgemegi meselelerine bagyşlanan ikinji Tomusky mekdebi işe girizdi. Şu ýyl taslama ýurdumyzyň ähli welaýatlaryndan 16–25 ýaş aralygyndaky 35 sany ýaşlary birleşdirdi. Olar 150 dalaşgäriň arasyndan berk saýlama esasynda seçilip alyndy.
Okuw maksatnamasy dört ugurdan ybaratdyr. Gatnaşyjylar suw serişdelerini durnukly dolandyrmak, biologik dürlüligi goramak, çölleşmä garşy göreşmek, şäherleri ekologiýalaşdyrmak hem-de galyndylary dolandyrmak ýaly ugurlary öwrenerler.
Sapaklary milli we halkara bilermenler alyp barýarlar. Nazary okuwlar interaktiw türgenleşikler, toparlaýyn taslamalar we göçme amaly saparlar bilen utgaşdyrylar. ÝUNISEF-iň Türkmenistandaky wekiliniň orunbasary Žanar Sagimbaýewa howanyň üýtgemeginiň täze nesliň geljegine gönüden-göni täsir edýändigini belläp, ýaşlaryň bu işe işjeň gatnaşmagynyň aýratyn möhümdigini aýtdy.
2026-njy ýylyň Tomusky mekdebi aýratyn wezipäni ýerine ýetirýär. Ol LCOY Turkmenistan 2026 Milli ýaşlar howa maslahatyna resmi taýýarlyk meýdançasy bolup hyzmat edýär. Gatnaşyjylar COP31 howa sammiti üçin Milli ýaşlar beýannamasyny taýýarlamaga gönüden-göni goşant goşup, Türkmenistanyň ýaşlar ekologiýa hereketiniň garaýşyny halkara derejede beýan ederler.
Okuw tamamlanandan soň, gatnaşyjylar öz ekologiýa başlangyçlaryny hödürläp bilerler. Iň gowy taslamalar bolsa, ýerli derejede durmuşa geçirmek üçin ÝUNISEF-iň bilermenleriniň goldawyny alar.
ORIENT
