Türkmenistanyň wekiliýeti Ženewada geçirilýän «Codex Alimentarius» komissiýasynyň mejlisine gatnaşýar
Türkmenistanyň wekiliýeti 2026-njy ýylyň 6–10-njy iýuly aralygynda Şweýsariýanyň Ženewa şäherinde geçirilýän «Codex Alimentarius» komissiýasynyň 49-njy mejlisine gatnaşýar. Türkmenistanyň wekiliýetiniň düzümine Döwlet weterinariýa gullugynyň wekili, lukman Arslan Soltanmyradow hem-de Saglygy goraýyş we derman senagaty ministrliginiň wekili Maýa Annanepesowa girýär.
Bu komissiýa BMG-niň Azyk we oba hojalyk guramasy (FAO) bilen Bütindünýä Saglygy Goraýyş Guramasynyň (BSGG) iň ýokary hökümetara edarasy bolup, onuň esasy wezipesi azyk önümleriniň howpsuzlygy boýunça halkara ülňülerini işläp taýýarlamak, sarp edijileriň saglygyny goramak hem-de dünýä bazarynda azyk söwdasynyň adalatly alnyp barylmagyny üpjün etmekden ybaratdyr.
Ženewanyň Halkara maslahatlar merkezinde geçirilýän köp günlük mejlisiň dowamynda türkmen hünärmenleri plenar mejlislerine we tehniki maslahatlaşmalara işjeň gatnaşarlar. Forumyň çäginde azyk önümleriniň hiline gözegçilik ulgamlaryny kämilleşdirmek, biohowpsuzlyk, milli sanitariýa talaplaryny halkara ölçeglerine laýyk getirmek hem-de pudagara hyzmatdaşlygy ösdürmek meseleleri ara alnyp maslahatlaşylýar.
ORIENT
