Russiýada kosmonawtlar üçin özboluşly «Aý synag meýdançasy» dörediler
Russiýanyň Federal lukmançylyk-biologiýa agentligi (FLBA) Aýyň ýüzündäki şertleri doly gaýtalaýan ýerüsti analog toplumyny döredýär. Bu taslama geljekde planetalaryň arasyndaky missiýalara gatnaşjak ekipažlary taýýarlamak boýunça Russiýanyň kosmos pudagynyň ileri tutulýan strategik ugurlarynyň birine öwrüler.
Ýörite synag meýdançasynda kosmonawtlar kosmos gämisinden daşarda işlemek üçin zerur bolan esasy başarnyklary özleşdirerler. Olar ýaşaýyş modulyny dogry terk etmegi, enjamlary abatlamagy we olara hyzmat etmegi, şeýle hem Aýdan gaýdyp gelnende ýelmeşýän Aý tozanyny arassalamak ýaly möhüm meseläni çözmegi öwrenerler. Şeýle hem adatdan daşary ýagdaýlarda hereket etmegiň düzgünlerini işläp taýýarlamaga we uzak möhletli stres şertlerinde ekipažyň psihologik ýagdaýyna baha bermäge aýratyn üns berler.
Şol bir wagtyň özünde FLBA-nyň institutlary adamyň westibulýar we duýuş ulgamlaryny kosmos uçuşynyň şertlerine taýýarlamak üçin innowasion türgenleşdiriji enjamlary döredýärler. Bu alymlara kosmonawtlaryň Aýa gonan badyna çylşyrymly wezipeleri netijeli ýerine ýetirip bilmegi üçin täze usullary işläp taýýarlamaga mümkinçilik berer. Agentligiň wekilleriniň bellemegine görä, şeýle toplumyň döredilmegi fiziologiýa bilen tehnologiýalaryň sepgidinde özboluşly tejribäni talap edýän örän çylşyrymly inženerçilik-lukmançylyk meselesidir.
ORIENT
