Arkadag şäherinde telefon belgileriniň sany 7 müňden geçer
2026-njy ýylda Arkadag şäherinde esasy telefon belgileriniň sany 7 müňden geçer. Şolaryň 5 290-sy öý abonentleri üçin niýetlenendir. Mundan başga-da, TMCELL ykjam aragatnaşyk hyzmatlary bilen 4 380 ulanyjyny üpjün etmek meýilleşdirilýär. Bu barada «Türkmenistan» gazetinde habar berilýär.
Optiki-süýüm aragatnaşyk torunyň ösdürilmegi netijesinde şäheriň ýaşaýjylary we edaralary ýokary tizlikli internetden, IP-telewideniýeden hem-de häzirki zaman telefon aragatnaşygyndan peýdalanýarlar.
Şeýle hem, Arkadag şäherinde sanly tehnologiýalary gündelik durmuşda ulanmak üçin ähli şertler döredildi. Hususan-da, ýaşaýjylar smartfon arkaly internetiň üsti bilen öz öýleriniň inženerçilik ulgamlaryny uzak aralykdan dolandyryp bilýärler.
Şäherdäki ýaşaýyş jaýlaryny we edaralary ýokary tizlikli internet ulgamyna birikdirmek boýunça işler mundan beýläk hem dowam etdiriler.
