HMD emeli aňly we wideo jaňly täze Nokia düwmeli telefonlaryny tanyşdyrdy
HMD Global kompaniýasy dört sany täze düwmeli telefonyny — Nokia 200 4G, Nokia 210 4G, Nokia 215 4G we Nokia 235 4G modellerini hödürledi. Täze nusgalaryň esasy aýratynlygy içerki emeli aňyň ornaşdyrylmagy we häzirki zaman mümkinçilikleriniň goldanylmagydyr.
Täze telefonlaryň ählisi Xpress messenjeri we wideo jaňlary amala aşyrmak üçin öň kamerasy bilen enjamlaşdyryldy. Emeli aň esasynda işleýän ses kömekçisi gelýän jaňlara özbaşdak jogap berip, el çyrasyny ýakyp ýa-da jaň sagadyny sazlap bilýär. Şeýle hem telefonlarda habarlar, howa maglumaty we gysga wideo şekiller üçin bulut esasly mini-goşundylar elýeterlidir.
Nokia 215 we Nokia 235 4G modelleri 2,8 dýuýmlyk ekran bilen, Nokia 200 we Nokia 210 bolsa 2,4 dýuýmlyk displeý bilen üpjün edildi. Iň ýokary derejeli Nokia 235 4G 2 MP kamera, Nokia 210 bolsa 0,3 MP kamera bilen enjamlaşdyryldy. Esasy Nokia 200 4G modelinde bolsa ne esasy kamera, ne-de el çyrasy bar. Telefonlar dürli açyk reňklerde satuwa çykarylar, olaryň bahasy bolsa soňra yglan ediler.
ORIENT
