«Aeroflot» «Belavia» bilen bilelikde bitewi petekleri Türkmenistan ugruna satuwa çykardy
«Aeroflot» «Belavia» belarus awiakompaniýasy bilen interlaýn ylalaşygynyň çäklerinde awiapetekleriň satuwyna başlady. Indi ýolagçylar Minsk arkaly Gruziýa, Ysraýyla we Türkmenistana bir bitewi petek bilen syýahat edip bilerler diýip, Russiýanyň awiakompaniýasy habar berdi.
Ylalaşyga laýyklykda, ýolagçylar Minskiň üsti bilen Tbilisi, Kutaisi, Batumi, Tel-Awiw we Türkmenbaşy şäherlerine bir bitewi petek esasynda uçarlar. Moskwa bilen Minskiň arasyndaky gatnawlary «Aeroflot», Minskden soňky uçuşlary bolsa «Belavia» amala aşyrar diýip, habarda aýdylýar.
Şeýle hem bu ylalaşyk Minskden, Gomelden, Brestden we Mogilýowdan Moskwa ýa-da Sankt-Peterburga, ol ýerden bolsa «Aeroflotyň» ugurlar torundaky beýleki şäherlere dowam etdirilýän gatnawlary hem öz içine alýar. Belarus bilen Russiýanyň arasyndaky uçuşlary «Belavia», soňraky gatnawlary bolsa «Aeroflot» ýerine ýetirer.
Petekleri goşly ýa-da goşsuz nyrhlar boýunça satyn almak mümkin. Emma Türkmenistana we Türkmenistandan amala aşyrylýan uçuşlar üçin diňe goşly nyrhlar elýeterlidir. Hasaba alyş ähli ugur boýunça bir gezekde amala aşyrylar. Ýolagçylar goşlaryny ahyrky barjak nokadyna çenli tabşyryp, Minskdäki we birleşdiriji uçuşlar üçin ähli münüş talonlaryny bir wagtda alyp bilerler.
