Ýewropa Komissiýasy kämillik ýaşyna ýetmedikler üçin sosial ulgamlaryň ulanylmagyny gadagan etmegi meýilleşdirýär
Sanly dünýä häzirki wagtda durmuşyň aýrylmaz bölegine öwrüldi, emma onuň gapylary hemmeler üçin çäklendirilmedik ýagdaýda açyk. Ruhy taýdan heniz doly kemala gelmedik çagalar uly ýaşlylaryň maglumat giňişligi bilen birmeňzeş gurşawda galýarlar we taýýar bolmadyk töwekgelçiliklere duçar bolýarlar. Ýaş nesli wirtual giňişligiň howplaryndan goramak häzirki jemgyýetiň esasy wezipeleriniň birine öwrülýär we Ýewropa Bileleşigi bu ugurda möhüm ädim ädmegi meýilleşdirýär.
Ýewropanyň “Euractiv” köpçülikleýin habar beriş serişdesiniň penşenbe güni beren habaryna görä, Ýewropa Komissiýasy şu ýylyň sentýabr aýynda Ýewropa Bileleşiginiň ähli çäginde kämillik ýaşyna ýetmedikler üçin sosial ulgamlaryň ulanylmagyny gadagan etmek baradaky meýilnamany hödürlär diýlip garaşylýar. Ýewropa Bileleşigine agza döwletlerine bu teklibiň jikme-jiklikleri eýýäm habar berildi. Ýewropa Bileleşiginiň birnäçe resmi wekilleri Komissiýanyň başlygy Ursula fon der Lýaýenanyň 16 sentýabrda Ýewropa Parlamentine ýyllyk ýüzlenmesinde bu barada yglan etjekdigini aýtdylar.
Kämillik ýaşyna ýetmedikleriň onlaýn howpsuzlygy boýunça maslahat beriji topar 13 iýulda degişli hasabaty hödürlär, bu bolsa Komissiýanyň karar kabul etmegine esas bolar. Emma sosial ulgamlary ulanmak üçin haýsy ýaş çäginiň kesgitlenjekdigi we bu meýilnamanyň iş ýüzünde nähili ýerine ýetiriljekdigi henizem düşnüksiz bolup galýar. Agza ýurtlaryň hökümetleri bolsa bu gadagançylygyň ýerine ýetirilişi boýunça dürli teklipleri öňe sürdüler — kämillik ýaşyna ýetmedikleriň belli bir ýaşdan kiçiler üçin doly çäklendirmeden başlap, ene-atalaryň açyk razylygyny talap etmäge çenli dürli görnüşler bar.
Soňky döwürde Ýewropa Bileleşiginiň birnäçe ýurdunyň özbaşdak çäklendirmeleri girizendigi ýa-da girizmegi meýilleşdirýändigi bellenilýär. Aprel aýynda Fransiýanyň Prezidenti Emmanuel Makron 15 ýaşdan kiçi çagalar üçin sosial ulgamlary gadagan etmegi teklip etdi. Fewral aýynda Ispaniýanyň Premýer-ministri Pedro Sançes 16 ýaşdan kiçilere platformalara girişi gadagan edýän kanuny kabul etmek barada maksatlaryny mälim etdi. Media seljerijileriniň bellemegine görä, ýurtlar bu ugurda başlangyçlary öz üstüne alýan mahaly, kämillik ýaşyna ýetmedikler üçin sosial ulgamlaryň ulanylmagyny gadagan edýän bitewi Ýewropa derejesindäki düzgünnamanyň zerurlygy çalt artýar.
"CCTV+"-iň habar bermegine görä ýakyn aýlarda bu teklip boýunça çekişmeleriň Ýewropa Bileleşiginiň institutlarynda hem-de milli hökümetlerde has-da güýçlenmegine garaşylýar.
