Ýewropada yssy howa adam pidalaryna getirýär: Ispaniýada 1029 adam aradan çykdy, Portugaliýada howanyň temperaturasy 47°C
Ýewropada dowam edýän aşa yssy howa köp sanly adam pidalaryna sebäp bolýar we hökümetleri gyssagly çäreleri görmäge mejbur edýär. Howanyň temperaturasy 47 gradusa ýetende we aradan çykanlaryň sany müňlerçe adama baranda, yssy howa indi diňe bir tebigy hadysa bolman, adam ömrüne howp salýan betbagtçylyga öwrülýär. Häzirki wagtda Ispaniýa we Portugaliýa aşa yssynyň täsirini iň agyr duýýan ýurtlaryň hataryndadyr. Ýurduň ýolbaşçylary bu tebigy hadysa garşy ähli mümkinçilikleri herekete getirýärler.
Ispaniýanyň gündelik görkezijilerini yzarlaýan "MoMo" ulgamynyň maglumatlaryna görä, iýun aýynda aşa yssy sebäpli 1029 adam aradan çykdy. Bu görkeziji 2015-nji ýylyň şol aýyndan bäri hasaba alnan iň ýokary aýlyk görkeziji boldy.
Ispaniýanyň Döwlet meteorologiýa gullugy geçen iýun aýynyň ýurtda gözegçilikleriň başlanaly bäri iň yssy ikinji iýun bolandygyny habar berdi. Howanyň ortaça temperaturasy kadaly derejesinden 3,2 gradus selsiýadan ýokary boldy.
Portugaliýada bolsa aşa yssy sebäpli häkimiýetler çarşenbe güni howa howpy boýunça iň ýokary duýduryş derejesini yglan etdiler. Şeýle hem tokaý ýangynlarynyň öňüni almak boýunça çäreler güýçlendirildi we howp astyndaky ilat toparlaryna berilýän goldaw giňeldildi.
Içeri işler ministri Luis Neweş ýakyn günlerde howanyň temperaturasynyň 47 gradus selsiýa çenli ýetip biljekdigini aýdyp, ilaty örän seresaply bolmaga hem-de töwekgelçilikli hereketlerden gaça durmaga çagyrdy.
Bir aýyň dowamynda 1029 adamyň aradan çykmagy diňe bir statistika däl. Bu – tomsuň yssysyna döz gelip bilmedik eneleriň, atalaryň we goňşularyň ykbaly. Ýewropa dünýäniň beýleki sebitlerine garanyňda has çalt gyzýar we her täze temperatura rekordy howanyň üýtgemeginiň häzirki wagtda bolup geçýändigini ýene bir gezek görkezýär.
Ispaniýa we Portugaliýa bu ýagdaýyň aýdyň mysallarydyr. Häkimiýetler gadaganlyklary girizýär, meteorologlar bolsa täze temperatura rekordlaryny hasaba alýarlar. Esasy umyt, ilatyň duýduryşlara wagtynda gulak asmagydyr.
"CCTV+"-iň habar bermegine görä, ýakyn günlerde yssy howa has-da güýçlener. Şol sebäpli häkimiýetler ilaty, aýratyn-da ýakyn günlerde, ähli howpsuzlyk çärelerini berk berjaý etmäge çagyrýarlar.
