Türkmenistanda MICS7 barlagynyň jemleri boýunça giň gerimli maslahatlar tamamlandy
BMG-niň Çagalar gaznasy (UNICEF), Türkmenistanyň Statistika baradaky döwlet komiteti hem-de BMG-niň Ilat gaznasy (UNFPA) Köp görkezijiler boýunça klaster barlagynyň ýedinji tapgyrynyň (MICS7) esasy netijelerine bagyşlanan sebitleýin tegelek stollarynyň tapgyryny üstünlikli tamamlady.
10-njy iýundan 1-nji iýul aralygynda ähli welaýatlarda we Aşgabat şäherinde geçirilen maslahatlara döwlet edaralarynyň ýolbaşçylary, lukmanlar, mugallymlar hem-de durmuş ulgamy boýunça bilermenler gatnaşdy.
MICS7 barlagynyň netijeleri Türkmenistanda zenanlaryň we çagalaryň durmuş şertleri barada halkara ülňülerine laýyklykda taýýarlanan iň giňişleýin maglumatlary öz içine alýar. Duşuşyklarda saglygy goraýyş, bilim, çagalaryň irki ösüşi we adam hukuklaryny goramak ugurlaryndaky ýagdaýlar giňişleýin seljerildi.
Şeýle hem sebitleriň görkezijilerini deňeşdirmäge aýratyn üns berildi. Bu bolsa döwlete has takyk durmuş maksatnamalaryny işläp taýýarlamaga hem-de oba ýerlerinde ýaşaýan maşgalalara we maýyplygy bolan çagalara gönükdirilen goldawy has netijeli guramaga mümkinçilik berer.
ÝUNISEF-iň Türkmenistandaky wekili Jalpa Ratna ýokary hilli statistiki maglumatlaryň diňe sanlar bolman, eýsem her bir maşgalanyň durmuşyny gowulandyrmaga hyzmat etmelidigini belledi.
Maslahatlaryň jemleri ministrliklere we pudaklaýyn dolandyryş edaralaryna býujet serişdelerini has netijeli paýlamaga, döwlet hyzmatlarynyň hilini ýokarlandyrmaga hem-de çagalaryň hukuklary we gender deňligi boýunça halkara borçnamalary ýerine ýetirmäge ýardam eder.
ORIENT
