Döwletmämmet Azady adyndaky Türkmen milli dünýä dilleri institutynyň talyplary Germaniýada dil tejribeligini geçýärler
Döwletmämmet Azady adyndaky Türkmen milli dünýä dilleri institutynyň iň gowy 15 talyby hünär tejribeligini geçmek maksady bilen Germaniýa ugrady. Bu sapar abraýly Martin Lýuter adyndaky Halle-Wittenberg uniwersiteti bilen hereket edýän akademiki we medeni hyzmatdaşlyk baradaky ylalaşygyň çäklerinde guraldy.
Okuw-amaly maksatnama 29-njy iýundan 12-nji iýul aralygynda Germaniýanyň Halle şäherinde geçirilýär. Tejribelik Ýewropa dilleri we edebiýaty fakultetinde nemes dili hünäri boýunça bilim alýan geljekki mugallymlar üçin niýetlenendir. Maksatnamanyň esasy maksady talyplaryň gepleşik endiklerini kämilleşdirmek hem-de häzirki zaman pedagogik başarnyklaryny ösdürmekden ybaratdyr. Iki hepdelik intensiw okuw döwründe türkmen talyplary 72 sagatlyk gepleşik we okuw-amaly sapaklaryny geçerler.
Dil bilimini çuňlaşdyrmak bilen birlikde, bu tejribelik ýaş alymlara Ýewropanyň iň täze okatmak usullaryny öwrenmäge hem mümkinçilik berýär. Institutyň ýolbaşçylygynyň bellemegine görä, şeýle halkara tejribelik maksatnamalary iki ýurduň professor-mugallymlarynyň arasynda tejribe alyşmagyň mundan beýläk-de ösdürilmegine güýçli itergi berýär.
Geljekde bu hyzmatdaşlyk institutyň nemes kärdeşleri bilen bilelikdäki ylmy barlaglary giňeltmegine, talyplaryň akademiki hereketliligini ösdürmegine hem-de Türkmenistan bilen Germaniýanyň arasyndaky dostlukly, medeni we ynsanperwer gatnaşyklary has-da pugtalandyrmagyna ýardam eder.
ORIENT
