Samsung we SK hynix çip önümçiligine 590 milliard ABŞ dollary möçberinde maýa goýýar
Günorta Koreýanyň tehnologiýa ägirtleri Samsung Electronics we SK hynix ýarymgeçiriji çipleriň önümçiligini giňeltmek üçin bilelikde 590 milliard ABŞ dollaryndan gowrak maýa goýmagy meýilleşdirýärler. Günorta Koreýanyň hökümeti tarapyndan goldanylýan bu giň gerimli maksatnama ýakyn bäş ýylyň dowamynda ýurtda operatiw ýat (DRAM) önümçiliginiň möçberini iki esse artdyrmagy maksat edinýär.
Maýa goýumlarynyň esasy bölegi täze zawodlaryň gurluşygyna gönükdiriler. Kwanju şäherinde bäşe çenli iri ýarymgeçiriji kärhanasyny gurmak meýilleşdirilýär. Mundan başga-da, Samsung ýurduň günortasynda çipleri gaplamaga (packaging) niýetlenen täze zawodlary açar, SK hynix bolsa ýurduň demirgazygynda NAND fleş ýadynyň önümçiligini giňelder. Taslama Hyundai Motor ýaly beýleki iri kompaniýalar hem goşulyp, maýa goýumlarynyň bir bölegini maglumat merkezlerini (data merkezlerini) we robototehnikany ösdürmäge gönükdirer.
Taslamanyň strategik ähmiýetine garamazdan, iki kompaniýanyň hem paýnamalary 5 göterimden gowrak pese düşdi. Maýadarlar uzak möhletli ägirt uly çykdajylar barada alada bildirýärler. Şeýle hem bazarda emeli aň pudagyndaky häzirki ösüş depgininiň haýallamagy mümkin bolan aladalar artýar. Şeýle ýagdaýda täze zawodlara goýulýan uly maýa goýumlarynyň garaşylýan girdejini getirmezligi mümkin.
ORIENT
