Aşgabatda telekeçileri, hünärmenleri, talyplary we döredijilik adamlaryny birleşdirýän täze Bilelik Hub döredijilik merkezi açyldy
Bilelik Hub adaty koworking giňişliginden has köp mümkinçilikleri hödürleýär. Bu işlemek, aragatnaşyk saklamak, bilim almak we ösüş üçin niýetlenen köpugurly merkezdir. Bu ýerde açyk iş meýdançasy (open space), gepleşik otaglary, sungat studiýasy, okalga zolagy we dürli derejedäki, şol sanda halkara çärelerini geçirmek üçin häzirki zaman maslahatlar zaly döredildi.
Merkeziň esasy aýratynlyklarynyň biri hyzmatlary onlaýn sargyt etmek we tölemek ulgamydyr. Rezidentler we myhmanlar jaň etmezden ýa-da merkeze barmazdan, otaglaryň elýeterliligini özbaşdak barlap, laýyk giňişligi saýlap, ony onlaýn sargyt edip hem-de nagt däl görnüşde töleg geçirip bilýärler. Şeýle hem şahsy otag we beýleki sanly hyzmatlar hödürlenýär, bu bolsa merkezdäki işi has amatly edýär.
Merkeze gelýänleriň rahatlygy üçin ähli şertler döredildi. Bu ýerde kafe, häzirki zaman türgenleşik enjamlary bilen enjamlaşdyrylan fitnes burçy we dynç almak hem-de erkin söhbetdeşlik etmek üçin giň eýwan bar.
Ilkinji rezidentler üçin aýratyn teklip göz öňünde tutuldy — merkeziň işleýän ähli döwründe ähli hyzmatlara ömürlik 20 göterim arzanladyş berilýär. Mundan başga-da, rezidentler kofe bilen garşy alynar we tejribeli hünärmen tarapyndan mugt hukuk maslahatyny almak mümkinçiligi bolar.
Bilelik Hub diňe bir giňişlik däl. Bu pikirleriň döreýän, täze taslamalaryň amala aşyrylýan we hyzmatdaşlyk, döredijilik hem-de ösüş üçin täze mümkinçilikleriň açylýan jemgyýetidir.
ORIENT
