AD Ports we EGA Halifa portuny döwrebaplaşdyrmak üçin 84 million dirhem maýa goýýar
BAE-niň iň iri logistika kompaniýalarynyň biri bolan AD Ports Group hem-de alýuminiý öndürijisi Emirates Global Aluminium (EGA) strategik hyzmatdaşlygyny giňeldýändigini mälim etdi. Taraplar Halifa portundaky EGA-nyň ýöriteleşdirilen duralgasyny düýpli döwrebaplaşdyrmak üçin 84 million BAE dirhemi möçberinde bilelikdäki maýa goýum barada ylalaşyga gol çekdiler. Taslama ýük daşamalaryň möçberini artdyrmaga we ýurduň senagat pudagynyň dünýä bazaryndaky bäsdeşlige ukyplylygyny ýokarlandyrmaga gönükdirilendir.
Giň gerimli täzelenişiň esasy maksady portuň infrastrukturasy Newcastlemax görnüşli äpet gury ýük gämilerini kabul etmäge uýgunlaşdyrmakdan ybaratdyr. Şeýle gämiler häzirki ulanylýan gämilere garanyňda 15–20 göterim köp ýük daşamaga ukyplydyr.
2028-nji ýylyň awgust aýyna çenli dowam etjek taslamanyň çäklerinde düýbi çuňlatmak işleri geçiriler, kranlaryň konsol bölekleri uzaldylar, täze gämi daňylýan sütünler gurlar we goşmaça düşüriş desgalary işe giriziler.
Tehniki täzelenişiň netijesinde duralganyň geçirijilik ukyby ýylda 8 million tonna çenli dökme ýükleri kabul etmäge ýeter. Kompaniýalaryň ýolbaşçylarynyň bellemegine görä, Halifa porty alýuminini dünýä bazarlaryna eksport etmekde strategik ähmiýete eýedir. Täze infrastruktura çig malyň has howpsuz we çalt işlenilmegini üpjün etmek bilen birlikde, BAE-niň Ýakyn Gündogaryň öňdebaryjy senagat merkezleriniň biri hökmünde ornuny has-da berkider.
ORIENT
