Nothing kompaniýasy iýul aýyndaky tanyşdyrylyşdan öň Phone (4b) smartfonynyň dizaýnyny resmi taýdan görkezdi
Beýik Britaniýanyň tehnologiýa brendi Nothing özüniň ýakyn wagtda çykjak Phone (4b) smartfonynyň daşky keşbini resmi taýdan hödürledi. Kompaniýa täze modeliň 7-nji iýuldan satuwa çykaryljakdygyny tassyklady. Täze wideo-tizer enjamyň dizaýnynyň esasy aýratynlyklaryny açyp görkezdi, emma bilermenler we geljekki alyjylar üçin käbir soraglary henizem açyk galdyrdy.
Täze smartfonyň iň tapawutly aýratynlygy – korpusyň tekiz çarçuwasy we görünýän nurbatlary bilen bezelen, brendiň özboluşly açyk senagat stilindäki arka gapagydyr. Bu gezek inženerler korpusyň yzky böleginiň tutuş giňligini eýeleýän uly gönüburçly kamera modulyny ulanypdyrlar. Onuň içinde dik ýagdaýda ýerleşdirilen iki uly kamera obýektiwi bar.
Kameralaryň gapdalynda LED fleş we näbelli gara tegelek element ýerleşýär. Bilermenleriň pikirine görä, bu lazer awtofokus moduly ýa-da ýagtylyk datçigi bolup biler. Şeýle-de bolsa, kompaniýa onuň takyk wezipesi barada entek resmi maglumat bermedi.
Phone (4b) öňki modellerden Glyph Interface atly özboluşly LED yşyk zolaklaryny hem aldy. Bu yşyklar dürli bildirişleri wizual görnüşde görkezmek üçin ulanylýar.
Gyzykly tarapy, Phone (4b)-iň dizaýnynda CMF hatarynyň aýratynlyklary hem duýulýar. Şeýle-de bolsa, Nothing kompaniýasy şu ýyl bu subbrendiň býujet smartfonlarynyň çykarylmagyna garaşylmaýandygyny öňünden mälim edipdi.
Täze smartfonyň resmi tanyşdyrylyşyna iki hepdeden hem az wagt galýar. Kompaniýanyň ýakyn günlerde enjamyň tehniki häsiýetnamalaryny hem doly açyp görkezmegine garaşylýar.
ORIENT
