Air Belgium awiakompaniýasy Aşgabat howa menzili arkaly ýük gatnawlaryny ýola goýar
Türkmenistanyň Belgiýadaky ilçisi Sapar Pälwanow Air Belgium awiakompaniýasynyň baş edarasynda bolup, onuň baş direktory Žorž Şaşati bilen gepleşik geçirdi. Duşuşygyň dowamynda ozal gol çekilen ylalaşygyň çäklerinde Aşgabat arkaly ýük howa gatnawlaryny ýakyn wagtda işe girizmegiň amaly we tehniki meseleleri ara alnyp maslahatlaşyldy.
Belgiýaly awiagatnadyjy kompaniýanyň ýolbaşçysy Türkmenistanyň paýtagtyndaky halkara howa menziliniň mümkinçiliklerine ýokary baha berip, ony logistika we ulag nukdaýnazaryndan strategiki ähmiýetli hem-de özüne çekiji merkez diýip atlandyrdy. Şeýle hem Aşgabat Halkara howa menziliniň ýokary derejeli infrastruktura eýe bolup, üstaşyr geçirilýän ýükleriň ygtybarly, howpsuz we netijeli hyzmat edilmegini, şol sanda uçarlaryň çalt ýangyç bilen üpjün edilmegini hem-de ýokary hilli tehniki goldawy üpjün etmäge ukyplydygy bellenildi. Žorž Şaşati Türkmenistanyň häzirki wagtda halkara logistika operatorlary üçin hödürleýän amatly şertleriniň örän bäsdeşlige ukyplydygyny aýratyn nygtady.
Gepleşikleriň dowamynda diplomat we awiakompaniýanyň ýolbaşçysy geljekki uçuşlaryň tertibini we takmynan başlanjak möhletlerini hem ara alyp maslahatlaşdylar. Air Belgium awiakompaniýasynyň Aşgabat arkaly ilkinji ýük gatnawlaryny şu ýylyň awgust aýynyň başynda ýola goýmagy meýilleşdirilýär. Şunuň bilen baglylykda, Belgiýanyň ýük uçarynyň Aşgabada ilkinji gonuşyna bagyşlanyp dabaraly açylyş çäresini guramak mümkinçiligi hem ara alnyp maslahatlaşyldy.
Türkmenistanyň ilçisi öz gezeginde ýurduň Aziýa bilen Ýewropanyň arasyndaky ählumumy ulag-logistika ulgamynda ygtybarly, howpsuz we açyk hyzmatdaş hökmünde ornuny yzygiderli berkitýändigini belledi. Awiasiýa logistikasynyň ösdürilmegi halkara arabaglanyşyklary giňeltmäge hem-de Ýewraziýa giňişligindäki üstaşyr ugurlaryny diwersifikasiýalaşdyrmaga gönükdirilen uzak möhletli döwlet strategiýasynyň möhüm ugurlarynyň biri bolup durýar.
