Türkmenistanyň Bilim ministrliginde Yrak bilen hyzmatdaşlyk meseleleri ara alnyp maslahatlaşyldy
25-nji iýunda Türkmenistanyň bilim ministri Jumamyrat Gurbangeldiýew bilen Yrak Respublikasynyň Türkmenistandaky Ilçihanasynyň işleri wagtlaýyn ynanylan wekili Jabir Najm Abdulla Al-Attar bilen resmi duşuşyk geçirildi. Gepleşikleriň esasy meselesi bilim, ylym hem-de medeni-ynsanperwer ugurlarda ikitaraplaýyn hyzmatdaşlygy ösdürmek boldy.
Duşuşygyň dowamynda taraplar iki ýurduň ýokary okuw we orta mekdepleriniň arasynda göni hyzmatdaşlygy giňeltmegiň möhümdigini bellediler. Bilelikdäki akademiki maksatnamalary işe girizmek, mugallymlaryň we talyplaryň tejribe alyşmagyny ýola goýmak, şeýle hem medeniýetara dialogy çuňlaşdyrmaga gönükdirilen başlangyçlary durmuşa geçirmek esasy ugurlar hökmünde görkezildi.
Duşuşygyň jemleri boýunça taraplar uzak möhletleýin hyzmatdaşlygy ösdürmäge taýýardyklaryny tassykladylar hem-de Türkmenistanyň we Yragyň bilim ulgamyndaky hyzmatdaşlygyny täze hil derejesine çykarmaga ýardam berjek taslamalary jikme-jik ara alyp maslahatlaşmak barada ylalaşdylar.
ORIENT
