Tokioda Ýapon-Türkmen Parlamentara Dostluk toparynyň ozalky başlygy Toşiaki Endo Türkmenistanyň ýubileý medaly gowşuryldy
Tokioda Ýaponiýanyň Parlamentiniň binasynda Ýapon-Türkmen Parlamentara Dostluk toparynyň ozalky başlygy Toşiaki Endony sylaglamak dabarasy geçirildi. Döwletara we parlamentara hyzmatdaşlygyň ösdürilmegine goşan saldamly goşandy üçin ýapon syýasatçysyna Türkmenistanyň Hökümetiniň adyndan "Türkmenistanyň Bitaraplygynyň 30 ýyllygyna" ýadygärlik medaly, ýadygärlik kümüş nyşany we degişli şahadatnama gowşuryldy.
Çäre giň we abraýly gatnaşyjy toparyny bir ýere jemledi. Oňa Ýaponiýanyň Parlamentiniň deputatlary, Ýaponiýanyň Daşary işler ministrliginiň ýolbaşçylary, Tokioda akkreditirlenen diplomatik wekilhanalaryň ýolbaşçysy, iri kompaniýalaryň wekilleri, şeýle hem Ýaponiýanyň öňdebaryjy ýokary okuw mekdeplerinde okaýan türkmen talyplary gatnaşdylar.
Dabarada Türkmenistanyň Ýaponiýadaky ilçisi Atadurdy Baýramow, Ýaponiýanyň Daşary işler ministriniň parlament işleri boýunça orunbasary Eri Arfiýa hem-de Ýapon-Türkmen Parlamentara Dostluk toparynyň täze başlygy Şinpeý Matsuşita gutlag sözleri bilen çykyş etdiler. Olar Toşiaki Endonyň toparyň ýolbaşçysy hökmünde köpýyllyk işine ýokary baha berip, onuň şahsy tagallalarynyň iki ýurduň kanun çykaryjy edaralarynyň arasyndaky gatnaşyklary täze ynamly derejä çykarmaga ýardam edendigini nygtadylar.
Öz çykyşynda Toşiaki Endo öz işine berlen ýokary baha üçin Türkmenistanyň Hökümetine çuňňur minnetdarlyk bildirdi. Ol Dostluk toparynyň ýolbaşçy wezipesindäki resmi missiýasy tamamlanandygyna garamazdan, Türkmenistanyň we Ýaponiýanyň arasyndaky hyzmatdaşlygy güýçlendirmek, bilelikdäki taslamalary ösdürmek we medeni-ynsanperwer dialogy giňeltmek ugrunda mundan beýläk hem tagallalary etjekdigini aýratyn belledi.
