Özbek halk tansy Ginnesiň rekordlar kitabyna girizildi
Andižan polkasy atly tans dünýäde milli tansyň iň köp adam tarapyndan bir wagtda ýerine ýetirilmegi hökmünde Ginnesiň rekordlar kitabyna girizildi. Ony Özbegistanyň Andižan şäherinde bir wagtyň özünde 20 müň adam ýerine ýetirdi.
Andižan polkasy özbek halk tansy we şol bir at bilen tanalýan saz eseridir. Ol çalt depgini hem-de elleriň täsirli hereketleri bilen tapawutlanýar. Ilkibaşda tansy erkekler ýerine ýetiripdirler, emma wagtyň geçmegi bilen ol zenanlaryň arasynda-da giň meşhurlyk gazandy.
Habarda bellenilişi ýaly, «Özbek milli tans sungatynyň taryhynda uly medeni waka bolup geçdi — meşhur “Andižan polkasy” tansy resmi taýdan Ginnesiň rekordlar kitabyna girizildi».
Rekord derejedäki gatnaşyjylar tansy Babur Arena stadionynda ýerine ýetirdiler.
Tansyň köpçülikleýin ýerine ýetirilmegi Andižanyň 2026-njy ýylda türki dünýäsiniň medeni paýtagty diýlip yglan edilmegi bilen bir wagtda geçirildi. Ginnesiň rekordlar guramasynyň resmi wekili çärä şahsy gatnaşyp, ähli talaplaryň doly ýerine ýetirilendigini tassyklady. Şonuň netijesinde rekord resmi taýdan hasaba alyndy.
Andižan Özbegistanyň Fergana jülgesiniň gündogarynda ýerleşýän iri dolandyryş, ykdysady we medeni merkezleriň biridir. Şäher ýurduň möhüm senagat merkezlerinden biri bolup, Merkezi Aziýanyň iň gadymy şäherleriniň hataryna girýär. Onuň taryhy takmynan 2 500 ýyl mundan ozala uzaýar we ol öz döwründe Beýik Ýüpek ýolunyň möhüm merkezleriniň biri bolupdyr.
