Türkmenistanyň Halkara nebit we gaz uniwersitetiniň mugallymlary Pekin şäherinde hünär derejesini ýokarlandyryş okuwlaryny geçýärler
22-nji iýunda Pekindäki Hytaýyň nebit uniwersitetinde Ýagşygeldi Kakaýew adyndaky Halkara nebit we gaz uniwersitetiniň professor-mugallymlar düzümi üçin hünär derejesini ýokarlandyryş okuwlarynyň açylyş dabarasy geçirildi. Bu bilim taslamasy bilelikdäki Türkmen-Hytaý energetika okuw merkeziniň binýadynda guraldy we ol öňdebaryjy ylmy-tehniki üstünlikleri ugurdaş ýokary okuw mekdepleriniň okuw işine ornaşdyrmaga gönükdirildi. Dabara Türkmenistanyň HHR-daky Ilçihanasynyň diplomatlary, Pekiniň ýokary okuw mekdebiniň ýolbaşçylary we professorlar düzümi, şeýle hem Hytaýa gelen türkmen wekiliýeti gatnaşdy.
Açylyş dabarasynyň dowamynda taraplar nebitgaz biliminiň hilini ýokarlandyrmagyň strategik taraplaryny, akademiki alyş-çalyş maksatnamalarynyň gerimini giňeltmegi we bilelikdäki ylmy-barlag başlangyçlaryny amala aşyrmagy bellediler. Bilermenler HHR-iň Döwlet geňeşiniň Premýer-ministriniň orunbasary Din Sýuesýanyň Türkmenistana amala aşyran saparynyň çäginde şu ýylyň aprel ayynda Aşgabatda açylan «Lu Ban ussahanasynyň» netijeli işlemegine aýratyn üns berdiler. Bu meýdança eýýäm innowasion tehnologiýalary ornaşdyrmak üçin netijeli platforma öwrüldi.
Resmi bölek tamamlanandan soň, türkmen diplomatlary we Halkara nebit we gaz uniwersitetiniň wekilleri Hytaýyň nebit uniwersitetiniň talyplary bilen duşuşyk geçirdiler. Duşuşygyň dowamynda olar ýaşlary Türkmenistanyň hemişelik Bitaraplyk daşary syýasat ugrunyň esasy ugurlary we ýurduň 2026-njy ýyl üçin kesgitlenen strategik wezipeleri bilen tanyşdyrdylar.
