Türkmenistanly mekdep okuwçylary Niderlandlarda geçirilen robototehnika boýunça Ýewropa finalynda iň gowy 20 toparyň hataryna girdi
Aşgabat şäherindäki 97-nji ýöriteleşdirilen orta mekdebine wekilçilik edýän "Oguzrobot" ýaş inženerler we programmaçylar topary FIRST Tech Challenge European Premier Event 2026 atly Ýewropa çempionatynda uly halkara üstünligini gazandy. Dünýäniň 33 ýurdundan gelen iň güýçli 105 topary bir ýere jemlän abraýly tehnologiýa ýaryşlary 16–20-njy iýunda Niderlandlaryň Eýndhowen şäherindäki Indoor-Sportcentrum sport merkezinde geçirildi. Jemleýji tapgyrdaky çekeleşikli ýaryşlaryň netijesinde türkmenistanly ýokary synp okuwçylary ýokary derejeli tehniki taýýarlyklaryny görkezip, Ýewropanyň iň gowy robototehnika toparlarynyň ilkinji ýigrimiligine ynamly girmäge başardylar. Ýaşlar Niderlandlaryň STEAMup gaznasy tarapyndan guralan bu abraýly IT bäsleşigine gatnaşmak hukugyny ozal Gazagystanyň Astana şäherinde geçirilen Merkezi Aziýa saýlama tapgyrynda ýokary baýraklara mynasyp bolup gazandylar.
Bu üstünlik mynasybetli Türkmenistanyň Belgiýadaky Adatdan daşary we Doly ygtyýarly ilçisi Sapar Pälwanow toparyň agzalaryny we olaryň ýolbaşçysyny Brýusseldäki ilçihananyň binasyna çagyrdy. Toparyň düzümine Aşgabadyň zehinli okuwçylary Dürdäne Gurbanowa, Ogulaý Kulyýewa, Oraznyýaz Rejepow, Nepesaly Täçmyradow we Nuraly Kerimow girdi. Olar öz taslama işlerini tejribeli halypa Gurban Seýitgulyýewiň ýolbaşçylygynda taýýarladylar.
Ýyly we ruhlandyryjy ýagdaýda geçen duşuşygyň dowamynda ilçi ýaşlary bu ýokary halkara üstünligi bilen gutlap, olaryň robototehnika, inženerçilik we IT ulgamyndaky gazananlarynyň Türkmenistanyň ýaş nesliniň ägirt uly intellektual kuwwatynyň aýdyň subutnamasydygyny belledi. Şeýle hem diplomat okuwçylary ilçihananyň işi bilen tanyşdyrdy, diplomatik gullugyň aýratynlyklary hem-de halkara hyzmatdaşlygynyň milli ylmy we bilim taslamalaryny Ýewropa giňişliginde ilerletmekdäki ähmiýeti barada giňişleýin gürrüň berdi. Duşuşygyň ahyrynda ol ýaş robototehniklere täze üstünlikleri arzuw edip, olary geljekki tehnologik gazananlara ruhlandyrdy.
