Kiýewde Magtymgulynyň şygryýet günleri geçirildi
11–20-nji iýun aralygynda Ukrainanyň paýtagty Kiýew şäherinde diplomatlary, alymlary, ýazyjylary we talyp ýaşlary bir ýere jemlän «Magtymgulynyň şygryýet günleri» geçirildi. Türkmenistanyň Ukrainadaky Ilçihanasy bilen Kiýewdäki Magtymguly adyndaky kitaphananyň bilelikde guramagynda geçirilen medeni çäre Türkmenistanyň Medeniýet we sungat işgärleriniň hem-de Magtymguly Pyragynyň şygryýet güni, şeýle hem Türkmenistanyň Garaşsyzlygynyň 35 ýyllygy mynasybetli geçirilýän dabaralaryň çäklerinde guraldy.
Halkara myhmanlary üçin bu çäre türkmen medeniýetiniň köptaraply dünýäsini açmaga, onuň nusgawy edebiýatynyň çuňňur filosofiýasyna baha bermäge hem-de halklaryň arasyndaky dostlukly gatnaşyklary pugtalandyrmaga özboluşly mümkinçilik döretdi. Onlaýn we oflaýn görnüşlerde geçirilen duşuşyklar gatnaşyjylara Türkmenistanyň ruhy gymmatlyklary we özboluşly milli däpleri bilen has ýakyndan tanyşmaga ýardam berdi.
Şygryýet günleriniň dowamynda nusgawy şahyryň meşhur goşgulary türkmen, ukrain, fransuz we iňlis dillerinde filologlar, talyplar hem-de mekdep okuwçylary tarapyndan okaldy. Çäräniň döredijilik ruhuny has-da baýlaşdyran aýdym-saz çykyşlarynda ýerli mekdepleriň okuwçylary Magtymgulynyň goşgularyna öz mugallymlary tarapyndan döredilen sazlar esasynda taýýarlanan wokal eserleri ýerine ýetirdiler.
Forumyň myhmanlary üçin kitaphananyň düzüminde hereket edýän şahyryň muzeý otagyna hem gezelençler guraldy. Gatnaşyjylar dürli dillerde neşir edilen seýrek kitaplar, milli saz gurallary we Türkmenistanyň amaly-haşam sungatynyň täsin nusgalary bilen tanyşdylar.
Çäräniň jemleýji pursaty Kiýewdäki Magtymgulynyň ýadygärliginiň ýanynda «Soňy Dagy» goşgusynyň okalmagy boldy. Türkmen ýaşlary tarapyndan iki dilde ýerine ýetirilen Watana bolan söýgi we onuň abadançylygy baradaky setirler beýik şahyryň döredijiliginiň täze nesilleri ruhlandyrýandygyny hem-de halklaryň arasyndaky medeni hyzmatdaşlygy mundan beýläk-de ösdürmek üçin ygtybarly binýat bolup hyzmat edýändigini ýene-de bir gezek görkezdi.
ORIENT
