Izmirde 12-nji halkara Future Fish Eurasia sergisi geçiriler
2026-njy ýylyň 24–26-njy sentýabry aralygynda Türkiýäniň Izmir şäheriniň Gaziemir sergi merkezinde deňiz önümleriniň eksporty we gaýtadan işleniş tehnologiýalaryna, akwa medeniýeti hem-de balykçylyk pudagyna bagyşlanan 12-nji halkara Future Fish Eurasia sergisi geçiriler. Bu çäre Türkiýede balykçylyk pudagyna ýöriteleşdirilen ýeke-täk sergi bolup, Ýewropadan, Aziýadan, Ýakyn Gündogardan we Demirgazyk Afrikadan gelýän hünärmenler üçin özboluşly halkara platforma bolar.
Serginiň esasy maksady işewürlik wekillerine ösüp barýan bazarlara çykmak we halkara hyzmatdaşlyk toruny giňeltmek üçin netijeli meýdança döretmekden ybaratdyr. Şu ýyl çäre AquaFeed Eurasia sergisi we maslahaty bilen bilelikde geçiriler. Şeýle birleşme sergä gatnaşýan kompaniýalara öz innowasion işläp taýýarlamalaryny hünärmenleriň giň toparyna gönüden-göni tanyşdyrmak üçin aýratyn mümkinçilik döreder.
Maslahatyň işewürlik maksatnamasy pudagyň esasy meselelerini çözmäge, innowasiýalary ornaşdyrmaga we önümçiligi kämilleşdirmäge gönükdiriler. Dünýäniň öňdebaryjy hünärmenleri akwa medeniýetde emeli aňyň hem-de akylly oba hojalyk tehnologiýalarynyň ulanylyşy, şeýle-de durnukly ösüş, galyndylary azaltmak we ekologiýa taýdan arassa çözgütleri ilerletmek meselelerini ara alyp maslahatlaşarlar.
Mundan başga-da, iýmleri gaýtadan işlemek usullaryna, iýmitlendirişdäki täze ugurlara, önümleriň hilini we howpsuzlygyny bahalandyrmaga aýratyn üns berler. Şeýle hem akwa medeniýet pudagynda saglygy goramak, şol sanda funksional iýmleriň we balyklar üçin alternatiw iýmit çeşmeleriniň ulanylyşy gün tertibinde möhüm orun eýelär.
Çäre pudagyň ähli ugurlaryny — iýme goşulýan goşundylardan we gaýtadan işleýiş enjamlaryndan başlap, logistika we taýýar önümleriň eksportyna çenli öz içine alar.
ORIENT
