Silent PC kompaniýasy AMD Ryzen 9000 prosessorlary bilen işleýän özboluşly suw geçirmeýän kompýuterini hödürledi
ABŞ-nyň Silent PC kompaniýasy AMD Ryzen 9000 nesliniň prosessorlaryna esaslanýan iň üýtgeşik kompýuterleriň birini bazara çykardy. Täze enjamyň esasy aýratynlyklary onuň doly sessiz işlemegi we IP65 senagat gorag standartyna laýyk gelýän germetik, suw geçirmeýän korpusydyr.
Bu kompýuter aýratyn kyn şertlerde ulanmak üçin işlenip düzüldi. Enjamda sowadyjy wentilýatorlar, öň tarapdaky USB portlary we audio birikdirijileri ýok. Ýylylygy daşyna çykarmak wezipesini bolsa metal korpusyň özi ýerine ýetirýär. Şeýle çözgüt elektronikanyň agyr şertlerde ygtybarly işlemegini üpjün edýär. Şonuň üçin kompýuteri deňiz gämilerinde, açyk meýdançalarda, awtoulaglarda ýa-da tozanly senagat kärhanalarynda arkaýyn ulanyp bolýar, sebäbi şeýle ýerlerde adaty kompýuterler tiz wagtda hatardan çykyp biler.
Başlangyç görnüşiniň bahasy 3350 ABŞ dollaryndan başlanýar. Ulgam alty ýadroly AMD Ryzen 5 9600X prosessory bilen üpjün edilýär, goşmaça 165 dollar tölemek arkaly ony Ryzen 7 9700X modeline çenli kämilleşdirmek mümkin. Şeýle hem enjam ASRock X600-ITX üstki karty, 32 GB göwrümli Crucial DDR5 operatiw ýady we ýokary tizlikli NVMe maglumat saklaýjy bilen enjamlaşdyrylandyr.
Bu modeliň täjirçilik we senagat pudagy üçin peýdasy aýdyň görünýär. Emma adaty ulanyjylar iki aýratynlyga üns bermelidirler. Birinjiden, kompýuterde ýokary talaply oýunlar üçin niýetlenen güýçli wideo karty ýok. Ikinjiden, wentilýatorsyz gurluş sebäpli ulgam güýçli gyzanda özüni goramak maksady bilen öndürijiligini wagtlaýyn peseldip biler.
ORIENT
