Puşkin adyndaky teatr Medeniýet hepdeliginiň çäklerinde premýera hödürlär
22–27-nji iýunda Balkan welaýaty Türkmenistanyň medeni durmuşynyň merkezine öwrüler. Bu ýerde Medeniýet we sungat işgärleriniň güni, şeýle hem Magtymguly Pyragynyň Şygryýet güni mynasybetli her ýyl geçirilýän Medeniýet hepdeligi guralar.
Medeniýet hepdeliginiň çäklerinde baýramçylyk çäreleri diňe bir ýurdumyzyň günbatar sebitinde däl, eýsem Aşgabat şäherinde hem geçiriler. A.S. Puşkin adyndaky Döwlet rus drama teatry tomaşaçylar üçin fransuz dramaturgy Florian Zelleriň «Maşgala durmuşyndan sahnalar: Ejejan» atly eseriniň premýerasyny taýýarlaýar.
Premýera 26-njy iýunda sagat 19:00-da geçiriler. Sahna oýnunyň gaýtadan görkezilişleri 27-nji we 28-nji iýunda hem sagat 19:00-da bolar.
Mundan başga-da, teatr ýaş tomaşaçylar üçin hem sahna eserlerini hödürlär. 27-nji iýunda sagat 12:00-da Korneý Çukowskiniň, Samuil Marşagyň we Olga Wolkowanyň eserleriniň esasynda taýýarlanan «Ertekiler dünýäsinde myhmançylykda» atly sahna oýny görkeziler.
28-nji iýunda bolsa tomaşaçylar M. Sadownikowyň «Ali-Baba» atly oýnuny görüp bilerler. Onuň görkezilişleri sagat 11:00-da we 13:00-da geçiriler.
