Türkmenistanyň we Polşanyň migrasiýa edaralary Warşawada Özara düşünişmek hakynda Ähtnama gol çekdiler
Warşawa şäherinde Polşa Respublikasynda saparda bolýan milli wekiliýete ýolbaşçylyk edýän Türkmenistanyň Döwlet migrasiýa gullugynyň başlygy Amanmuhammet Sazakow bilen Polşa Respublikasynyň Serhet gullugynyň başlygy Robert Baganyň arasynda iş duşuşygy geçirildi.
Gepleşikleriň dowamynda taraplar sebit howpsuzlygyny, durnuklylygy we yzygiderli ösüşi üpjün etmäge gönükdirilen halkara maksatnamalar we başlangyçlar boýunça hyzmatdaşlygy işjeň ösdürmäge taýýardyklaryny tassykladylar. Şeýle hem dünýä migrasiýa ulgamyndaky esasy meýiller barada giňişleýin pikir alyşdylar.
Duşuşygyň esasy netijesi hökmünde Türkmenistanyň Döwlet migrasiýa gullugy bilen Polşa Respublikasynyň Serhet gullugynyň arasynda Özara düşünişmek hakynda Ähtnama gol çekildi.
Bu resminamanyň amaly taýdan durmuşa geçirilmegi öňdebaryjy tejribeleri alyşmak üçin mümkinçilikleri giňeltmäge, yzygiderli ikitaraplaýyn maslahatlaşmalary we bilermenler derejesindäki duşuşyklary ýola goýmaga, şeýle hem iki ýurduň degişli ugurdaky hünärmenleriniň arasynda göni hünär gatnaşyklaryny pugtalandyrmaga gönükdirilendir.
Taraplar gol çekilen ähtnamanyň döwletara dialogy diwersifikasiýalaşdyrmak ýolunda möhüm ädim bolup durýandygyny hem-de Aşgabat bilen Warşawanyň arasynda migrasiýa ulgamyndaky uzak möhletleýin hyzmatdaşlyk üçin ygtybarly halkara-hukuk binýadyny döredýändigini bellediler.
