Kreatiw industriýalary GDA-nyň medeni dialogynyň täze formaty hökmünde – Sankt-Peterburgdan Aşgabada çenli
Sankt-Peterburgda medeni baglanyşyklary berkitmek we döredijilik hem-de kreatiw industriýalary ösdürmek boýunça Halkara maslahat geçirildi, ol öz meýdançasynda Arkalaşygyň ýurtlaryndan gelen ýolbaşçylary birleşdirdi. Bu abraýly foruma Bilim ministri Jumamyrat Gurbangeldiýewiň ýolbaşçylygyndaky Türkmenistanyň wekiliýeti gatnaşdy. Russiýa Federasiýasynyň Hökümetiniň Başlygy Mihail Mişustiniň, Belarusyň Premýer-ministri Aleksandr Turçiniň, Özbegistanyň Premýer-ministri Abdulla Aripowyň, Täjigistanyň Premýer-ministri Kohir Rasulzodanyň we Gyrgyzystanyň Ministrler Kabinetiniň Başlygynyň birinji orunbasary Adylbek Kasymaliýewiň gatnaşmagy çäräniň ýokary derejesini aýratyn görkezdi.
Gatnaşyjylaryň üns merkezinde umumy taryhy-medeni mirasy gorap saklamak, döwletara ynsanperwer dialogyny giňeltmek we häzirki zaman halkara hyzmatdaşlygynyň iň çalasyn ugurlarynyň biri hökmünde döwrebap kreatiw industriýalary ösdürmek meseleleri boldy.
Ählumumy medeni dialoga bagyşlanan umumy mejlisiň dowamynda, şeýle hem ugurlar boýunça geçirilen panel çekişmeleriniň çäklerinde wekiller kinematografiýa, teatr sungaty, saz medeniýeti, muzeý we kitaphana işi ulgamlaryndaky özara täsirleşmegiň häzirki zaman meýilleri hem-de uzak möhletleýin geljegi barada jikme-jik maslahatlaşdyrlar.
Daşary ýurtly kärdeşleriniň öňünde çykyş edip, Türkmenistanyň Bilim ministri Jumamyrat Gurbangeldiýew Türkmenistanyň 2026-njy ýylda GDA-da alyp barýan häzirki başlykylygynyň şertlerinde resmi Aşgabadyň ynsanperwer hyzmatdaşlygy işjeňleşdirmäge we özara täsirleşmegiň innowasion formatlaryny ornaşdyrmaga ýokary derejeli ähmiýet berýändigini aýratyn nygtady. Türkmenistan özüniň öňdenbörüji «açyk gapylar» syýasatyndan we BMG-niň Baş Assambleýasy tarapyndan ykrar edilen hemişelik Bitaraplyk derejesinden ugur alyp, medeniýete halklary netijeli birleşdirmäge, özara ynamy we çuňňur hormaty berkitmäge ukyply bolan binýatlaýyn «altyn köpri» hökmünde garaýar.
Wekiliýetiň ýolbaşçysynyň sözlerine görä, medeniýet we sungat elmydama däp-dessurlaryň özeni bolup durýardy. Olaryň güýji häzirki döwürde ruhy bitewiligiň berk esasyna öwrüldi we ata-babalarymyzyň mirasyny doňup galan taryha däl-de, eýsem janly siwilizasiýa koduna öwrüldi.
Asyrlaryň dowamynda türkmen halky özüniň özboluşly gymmatlyklaryny: senetçilik däp-dessurlaryny, maşgala, gymmatlygyny, zähmete we bilime bolan hormat-sarpany aýawly saklap gelýär. Şu günki günde Türkmenistan bu baýlygy gorap saklamak, öwrenmek we dünýä ýaýmak ugrunda diňe bir GDA-nyň çäklerinde däl, eýsem has giň halkara giňişliginde, aýratyn-da ÝUNESKO bilen netijeli hyzmatdaşlyk alyp barýar.
Bu prosesde «Arkalaşygyň medeni paýtagty» diýen döwletara maksatnama möhüm orun eýeleýär. Bu maksatnamanyň çäklerinde gadymy türkmen şäherleri bolan Merw we Daşoguz dürli ýyllarda GDA giňişliginde üns merkezlerine öwrüldiler. Bu tejribe bilelikdäki taslamalaryň dostluk gatnaşyklaryny berkidýändigini, arabaglanyşyklary giňeltýändigini we bütin Arkalaşygyň alymlary, döredijilik intelligensiýasy hem-de ýaşlary üçin täze gözýetimleri açýandygyny tassyklaýar.
Häzirki döwrüň çagyryşlarynyň üstünde durup geçmek bilen, türkmen tarapy wekilleriň ünsüni sanly tehnologiýalaryň we emeli aňyň çalt ösüşine aýratyn çekdi. Innowasiýalaryň köklerimizden aýrylmagymyza däl-de, eýsem däp-dessurlarymyzyň berkitilmegine hyzmat etmegi Türkmenistan üçin ýörelgeleri taýdan örän möhümdir. Resmi Aşgabat sanly guralary ebedi gymmatlyklary wagyz etmek, ösüp gelýän nesliň milli mirasymyza bolan gyzyklanmasyny artdyrmak we milli ýadygärliklerimizi wirtual giňişlikde görkezmek üçin özboluşly bir mümkinçilik hökmünde garaýar, bu bolsa olaryň alymlar, mugallymlar we giň jemgyýetçilik üçin elýeterli bolmagyny üpjün edýär.
Häzirki döwürde medeniýete diňe bir ruhy ulgam hökmünde däl, eýsem durnukly ösüşiň iň esasy guraly hökmünde baha bermek zerurdyr. Hut şonuň üçin hem Türkmenistan GDA giňişliginde Kreatiw industriýalar assosiasiýasyny döretmäge gönükdirilen innowasion ugury doly goldaýar. Bu ugrum ýaşlaryň döredijilik ukybyny ýüze çykarmak we milli brendlerimizi döwrebap formatlarda öňe sürmek üçin goşmaça mümkinçilikleri açýar.
Şu ýylyň ahyryna çenli Aşgabatda GDA-na agza döwletleriň Medeni hyzmatdaşlyk boýunça geňeşiniň mejlisini geçirmek meýilleşdirildi, onda taryhy mirasy gorap saklamagyň we ynsanperwer gatnaşyklary giňeltmegiň ileri tutulýan ugurlary anyk kesgitleniler.
Türkmen wekiliýetiniň Sankt-Peterburg forumyna işjeň gatnaşmagy, döwletimiziň Arkalaşyk giňişliginde dostlugy we özara düşünişmegi hemmetaraplaýyn ösdürmek ugruna yzygiderli we üýtgewsiz wepalylygyny ýene bir gezek aýdyň görkezdi. Maslahatyň çäklerinde türkmen tarapy medeni alyş-çalşygy güýçlendirmäge, giň gerimli tor taslamalaryny goldamaga hem-de GDA-a agza ýurtlaryň öňdebaryjy medeniýet edaralarynyň, ylmy-bilim merkezleriniň we döredijilik birleşikleriniň arasyndaky göni hünär gatnaşyklaryny uzak möhletleýin berkitmäge ýokary gyzyklanma bildirýändigini tassyklady.
