Tokio şäheriniň gubernatory Ýuriko Koike Aşgabada we "akylly" Arkadag şäherine sapar bilen çagyryldy
ORIENT | Diplomatiýa. Türkmenistanyň Ýaponiýadaky ilçisi Atadurdy Baýramow Tokioda geçirilen iş duşuşygynyň dowamynda Ýaponiýanyň paýtagtynyň gubernatory Ýuriko Koikeni taraplar üçin amatly wagtda Türkmenistana sapar bilen gelmäge çagyrdy. Çakylykda onuň Aşgabatda we "akylly" Arkadag şäherinde geçirilýän çärelere gatnaşmak mümkinçiligine aýratyn üns berildi.
Tokionyň gubernatory bilen geçirilen duşuşygyň esasy amaly mazmuny ýokary tehnologiýalary ornaşdyrmak we innowasion ösüş meselelerine bagyşlandy. Taraplar emeli aňy ulanmagyň mümkinçiliklerini, ählumumy sanly özgertmeleri, şeýle hem ikitaraplaýyn ykdysady, senagat we tehnologik hyzmatdaşlygy işjeňleşdirmegiň ugurlaryny jikme-jik ara alyp maslahatlaşdylar. Medeni dialogy ösdürmek we syýahatçylyk pudagyndaky hyzmatdaşlyk meseleleri hem ünsden düşürilmedi.
Türkmenistanyň Prezidentiniň 2025-nji ýylyň aprel we dekabr aýlarynda Tokioda Ýaponiýanyň Imperatory Naruhito hem-de Premýer-ministr Sanae Takaiçi bilen geçiren dostlukly we netijeli gepleşikleriniň aýratyn taryhy ähmiýete eýedigi nygtaldy. Bu gepleşikleriň häzirki wagtda durmuşa geçirilýän bilelikdäki taslamalar üçin berk binýat döredendigi bellenildi.
Strategik hyzmatdaşlygyň yzygiderli ösdürilýändiginiň nobatdaky subutnamasy hökmünde şu hepdede Aşgabatda Türkmenistanyň Daşary işler ministri Raşid Meredowyň Ýaponiýanyň Adatdan daşary we Doly ygtyýarly ilçisi Sasaki Hirosi bilen geçiren duşuşygy görkezildi.
Duşuşygyň dowamynda taraplar türkmen-ýapon gatnaşyklarynda gazanylýan ösüşi kanagatlanma bilen belläp, özara gyzyklanma döredýän täze hyzmatdaşlyk ugurlaryny ara alyp maslahatlaşdylar. Şeýle hem ýokary derejedäki yzygiderli gatnaşyklar we degişli ministrlikleriň arasyndaky üznüksiz syýasy dialogyň uzak möhletli esasda özara bähbitli türkmen-ýapon hyzmatdaşlygyny giňeltmegiň ygtybarly kepili bolup hyzmat edýändigi aýratyn nygtaldy.
