Türkmenistanyň Gruziýadaky Ilçisiniň Gruziýanyň Içeri işler ministri bilen duşuşygy
2026-njy ýylyň 19-njy iýunynda Türkmenistanyň Gruziýadaky Adatdan daşary we Doly ygtyýarly Ilçisi D.Seýitmämmedowyň Gruziýanyň Içeri işler ministri S.Tamazaşwili bilen duşuşygy boldy.
Duşuşygyň başynda Ilçi söhbetdeşini Içeri işler ministri wezipesine bellenilmegi bilen gutlady we geljekki işlerinde üstünlikler arzuw etdi.
Gepleşigiň dowamynda taraplar jemgyýetçilik howpsuzlygyny üpjün etmek, hukuk tertibini berkitmek, şeýle hem özara hyzmatdaşlygyň mehanizmlerini kämilleşdirmek ulgamyndaky özara bähbitli gatnaşyklaryň esasy meseleleri boýunça pikir alyşdylar.
Ilçi iki ýurduň degişli düzümleriniň arasyndaky ynanyşmak dialogyny has-da berkitmegiň möhümligini nygtap, hukuk goraýjy edaralaryň degişli ugurlary boýunça hyzmatdaşlygy ösdürmegiň ikitaraplaýyn gatnaşyklaryň möhüm bölegi bolup durýandygyny belledi.
Ministr öz gezeginde hyzmatdaşlygy çuňlaşdyrmaga we ugurdaş edaralaryň işiniň netijeliligini ýokarlandyrmaga gönükdirilen bilelikdäki başlangyçlary durmuşa geçirmäge taýýardygyny tassyklady.
Duşuşygyň ahyrynda taraplar ikitaraplaýyn duşuşyklaryň yzygiderli geçirilmegi hem-de iki ýurduň bähbitlerine laýyk gelýän özara gatnaşyklary mundan beýläk-de ösdürmegiň zerurdygyny bellediler.
